Փաստ ինֆո

ՍԴ նախագահ Հրայր Թովմասյանը Հայաստանում թշնամիներ չունի և որևէ մեկի հետ թշնամական հարաբերություններ ունենալ չի կարող: Այս մասին «Պրեսսինգ» հաղորդաշարի ընթացքում հայտարարել է ՍԴ նախագահ Հրայր Թովմասյանը՝ անդրադառնալով իր և Նիկոլ Փաշինյանի հարաբերություններին:

Նրա խոսքով՝ իր բոլոր թշնամիները սահմաններից դուրս են:

«Ես, որպես ՍԴ նախագահ, իրավունք չունեմ որևէ մեկի հետ լարված հարաբերություններ ունենալ։ Իմ լիազորությունները նման բան չեն ենթադրում։ Ես հարգանք ունեմ պետական ինստիտուտների նկատմամբ։ Ինչ վերաբերում է անձնական հարաբերություններին, իմ արժանապատվությանը հասցված վիրավորանքին, ապա ինձ կարող եմ պահել այնպես, ինչպես կպահեր ցանկացած հայ տղամարդ, ուստի այդ հարաբերությունները կբնութագրեմ ինստիտուցիոնալ, ինչը որ նախատեսված է մեր Սահմանադրությամբ՝ ինչպիսին կարող են լինել ՍԴ նախագահի և վարչապետի միջև հարաբերությունները»,-նշեց Թովմասյանը՝ հավեելով, որ լարված հարաբերությունները չեն կարող որևէ բիծ թողնել իր աշխատանքի և լիազորությունների վրա և ևս մեկ անգամ շեշտեց, որ Փաշինյանի հետ անձնական հարաբերություններ չունի:

«Եթե մի տեղ անձնականը վեր դրեցինք պետականից, այդ դեպքում պետությունը կավարտվի»,- նշեց ՍԴ նախագահը:

Աղբյուր` Փաստինֆո