Փաստ ինֆո

Մեզ համար անհասկանալի է, թե գործադիր իշխանությունն ինչու է միայն անդրադառնում Սահմանադրական դատարանին, երբ խոսքը վերաբերում է դատական իշխանության նկատմամբ անվստահությանը։ Այս մասին այսօր խորհրդարանական ճեպազրույցների ժամանակ ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը։

Նա ընդգծեց, որ հասարակությունը չի վստահում դատական իշխանությանը, քանի որ առաջին ատյանի դատարաններում իր սրտին, իր մտքին չհամապատասխանող որոշումներ է ստանում։

«Շատ դեպքերում մեր հասարակությունը ճիշտ է, որովհետև մեր դատական համակարգը օբյեկտիվ ու սուբյեկտիվ պատճառներով չի կարողանում արդյունավետ արդարադատություն իրականացնել։ Եվ այստեղ մեղավորը ոչ թե ՍԴ-ն է, այլ ամբողջ դատական համակարգը, սկսած առաջին ատյանի դատավորներից, վերջացրած Բարձրագույն դատական խորհրդով»,-ասաց Սիմոնյանը։

Նա ընդգծեց, որ սխալ մոտեցում է մոռանալ ամբողջ խնդիրն ու կենտրոնանալ մեկ անձի շուրջ. «Սա որևէ լուծման չի տանում։ Լավ, անձին փոխարինեցիք մեկ այլ անձով, բայց համակարգը մնում է չէ՞ ոչ աշխատունակ կամ ոչ լավ աշխատունակ վիճակում։ Անարդյունավետ է աշխատում»։

«Լուսավոր Հայաստան» խմբակցության պատգամավորը նշեց, որ շրջանառության մեջ դրվող մտայնությունը, թե մեկ դատավորին փոխելով ամբողջ դատական համակարգը կփոխվի, մտածելու տեղիք է տալիս։

«Սա կարող է դիտարկվել որպես մեկ իշխանության թևի ճնշում, մեկ այլ իշխանության թևի նկատմամբ, որն անընդունելի է, որովհետև մենք Սահմանադրությամբ իշխանությունների տարանջատման սկզբունք ենք ամրագրել և մի թևն իրավունք չունի ճնշել մեկ այլ թևի։ Կան հակակշիռների ու զսպումների լծակներ, որոնք Սահմանադրությամբ երաշխավորված են, եթե օրենքով սահմանված կարգով դրանք գործադրվում են, ապա որևէ բան չունենք ասելու, անգամ երբեմն միանում ենք նման նախաձեռնությունների, բայց եթե այդ զսպումները դուրս են գալիս սահմանադրությամբ թույլատրելի շրջանակներից և դա քաղաքական ճնշում է ենթադրվում, ապա այո, այստեղ խնդիր կա»,-ասաց Սիմոնյանը։

Աղբյուր` Փաստինֆո