Փաստ ինֆո

Կարծում եմ և՛ գործադիրը, և՛ օրենսդիրը համատեղ քայլեր կձեռնարկեն, որպեսզի ճգնաժամի լուծում տան։ Այս մասին լրագրողների հետ զրույցում ասաց Ազգային անվտանգության խորհրդի քարտուղար Արմեն Գրիգորյանը՝ անդրադառնալով ՍԴ-ի շուրջ ստեղծված իրավիճակին։

Դիտարկմանը, որ վարչապետը հայտարարել է՝ ՍԴ նախագահի ընտրությունները կեղծված են և Հրայր Թովմասյանը կեղծիքով է ընտրվել ՍԴ նախագահ, հետևապես իշխանություններն ի՞նչ քայլեր են ձեռնարկելու ստեղծված իրավիճակը լուծելու համար, Արմեն Գրիգորյանն  ասաց. «Իրավիճակին լուծում տալու ցանկացած քայլի մասին տեղյակ կպահեն։ Քննարկումներն ընթանում են։ Քայլեր արդեն եղել են, նույն վաղ կենսաթոշակի մասին օրենքը, բոլորը նպատակ ունեին ճգնաժամը լուծել, բայց քանի դեռ լուծում չի ստացել, շարունակելու ենք քայլեր ձեռնարկել»,-նշեց Արմեն Գրիգորյանը՝ ընդգծելով, որ սահմանդրական փոփոխությունները կարող են դրա մի ճանապարհը լինել։

Հարցին՝ ԱԱԾ նախկին տնօրեն Արթուր Վանեցյանի գործունեության հետ կասկածներ եղե՞լ են և արդյոք դրա համար հեռացվեց պաշտոնից, ԱԱԽ քարտուղարն արձագանքեց. «Այս հարցին վարչապետն իր մամուլի ասուլիսում անդրադարձել է՝ ընդհանուր կոնտեքստում ինչ խնդիրներ են եղել և կարծում եմ՝ արդեն թեման փակված է։ Եթե լինեն նոր զարգացումներ, բացատրություններ կտրվեն»-հավելեց ԱԱԽ քարտուղարը։

Աղբյուր` Փաստինֆո