Փաստ ինֆո

Վարչապետ Նիկոլ Փաշինյանը իր բազմաթիվ ելույթներում հաստատել է, որ ՍԴ-ի շուրջ ծավալվող իրադարձություններին անձամբ է հետեւում , անձամբ տեղեկացված է այդ գործողություններից եւ նույնիսկ կարելի է եզրակացնել, որ իր կողմից է այդ ամբողջ գործընթացը հրահանգվում:

«Փաստինֆո»-ի հետ զրույցում նման կարծիք հայտնեց փաստաբան Լուսինե Սահակյանը՝ անդրադառնալով ՍԴ-ի շուրջ ստեղծված իրավիճակի վերաբերյալ ՀՀ վարչապետ Նիկոլ Փաշինյանի՝ վերջին օրերին արած հայտարարություններին:

Փաստաբանի խոսքով երկրի վարչապետն իրավական հարության մեջ ամեն ինչ խեղաթյուրել է այն աստիճան, որ արդեն նույնիսկ առաջադրված ապօրինի մեղադրանքներն է խեղաթյուրում դատավճիռներ է կայացնում:

«Իրենք էլ դեռ կողմնորոշված չեն, թե ինչ ուղիով են գնալու, ում ինչի մեջ են մեղադրելու, սա արդեն ակնհայտ էր հենց իր խոսքում, բայց փաստ է, որ վարչապետը արդեն նույնիսկ դատավճիռ կայացրեց անձանց նկատմամբ, նա որոշեց, որ կեղծիքներ են եղել, որ լիազորություններ են օկուպացվել»,-ասաց փաստաբանը՝ ահազանգելով, որ երկրի ղեկավարը իրավունք չունի նման խոսքով հանդես գալ:

«Մենք շատ , շատ լուրջ խնդիր ենք ունենալու անմեղության կանխավարկածի հետ կապված, մենք շատ լուրջ խնդիր ենք ունենալու նրա հետ կապված, որ ակնհայտ է լինելու, որ դատարանները ենթարկվում են գործադիր իշխանությանը, որ ինքը այնքան վստահ է, որ դատարանները կայացնելու են իր համար ցանկալի դատական ակտեր, որ հիմա արդեն դրա մասին հայտարարում է: Սա խայտառակություն է երկրի համար»:

Լուսինե Սահակյանի խոսքով, Հայաստանի միջազգային հեղինակության համար խիստ վտանգավոր են նաեւ Նիկոլ Փաշինյանի՝ միջազգային հեղինակավոր կազմակերպությունների վերաբերյալ արած հայտարարությունները:

«Միջազգային հեղինակավոր կազմակերպությունների մասին է խոսում, խոսում է շատ արհամարհական տոնով, դեռ ասում է, որ մենք պետք է դրանով զբաղվենք, նրանց մեղադրում է իշխանության բռնազավթման մեջ մասնակցություն ունենալու համար: Սրա արդյունքը վատ չի լինելու Փաշինյանի համար, սրա արդյունքը վատ է լինելու ՀՀ-ի համար եւ եթե ՀՀ քաղաքացիները այս ամենի լրջությունը չեն հասկանում, ես չգիտեմ այլեւս ինչ ասել այդ քաղաքացիներին, որոնք այդքանը չեն գիտակցում, իսկ որ երկրի վարչապետը դա չի գիտակցում, դա արդեն խայտառակություն է: Նա չի հասկանում, որ երկրի հեղինակության հետ է խաղում՝ միջազգային հեղինակավոր կազմակերպություններին նման բանի մեջ մեղադրելով եւ առավել եւս մատ թափ տալով , թե դրանով զբաղվելու է»,-շետում է փաստաբանը:

Լուսինե Սահակյանը նաեւ անհասկանալի է համարում, թե վարչապետն այդ ինչ կերպ է պատրաստվում զբաղվել այդ կազմակերպություններով:

Փաստաբանն ասաց՝ իր մոտ տպավորությունն այնպիսին է թե, վարչապետը հընթացս է որոշում, թե ինչ հայտարարություններ պետք է անի:

Աղբյուր` Փաստինֆո