Փաստ ինֆո

Եկել է ժամանակը, որ տարբերվի լրագրությունը՝ պետական գործունեությունից։ Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը՝ անդրադառնալով ՀՀ վարչապետ Նիկոլ Փաշինյանի հայտարարությանը, թե ՍԴ նախագահի ընտրությունը ԱԺ-ում տեղի է ունեցել կեղծիքի միջոցով։

Ըստ Ալավերդյանի՝ պետական գործիչը չի կարող թույլ տալ իրեն այնպիսի հայտարարություններ, որոնք ապացուցված չեն օրենքով։

«Ես գտնում եմ, որ դրանք կոպիտ սխալներ են, որոնք թույլ են տրվում երկրի վարչապետի կողմից և ցավոք սրտի, կարծես թե չկա, որևէ ազդեցիկ մեկը, որը կկարողանա բացատրել այդ շատ հասարակ բանը, որովհետև խոսքը չի գնում միայն այն մասին, որ դա ասում է անձ, ի վերջո դա մեր երկրի ղեկավարն է և մեր երկիրն աշխարհում ճանաչվում է և այդպիսի հայտարարություններով և գործելակերպով»,- նշեց Լարիսա Ալավերդյանը։

Նրա խոսքով՝ շուրջ երկու տարի է, ինչ ստեղծվել է մի իրավիճակ, որ սկզբում տարածվում է վարկածը՝ ամենադատապարտելի մանիպուլյատիվ տեխնոլոգիաներով, ապա սկսվում է իրավական գործընթացը։

«Ընդհանրապես խոսքը միայն Հրայր Թովմասյանի մասին չէ, ում նկատմամբ քաղաքական հետապնդում է տեղի ունենում։ Խոսքը գնում է այն մթոնոլորտի մասին, որը երկրում ստեղծվում է և ամրանում է։ Ցավոք սրտի պետք է ասեմ, որ ժողովրդի մի մասը, որը անկեղծ հավատքով ընտրել է ղեկավարին, այսօր կանգնած է նոր խնդրի առջև՝ եթե իր խոսքերը ճշմարիտ են, ապա ինչու չի իրականացվում իրավական գործընթացը և համապատասխան պատասխանատվությունը։ եթե դա ուղղակի մտքի ոչ այդքան հիմնավոր մոտեցումներ են կամ կարծիքներ են, ապա կրկնում եմ, դա դատապարտելի է»,- ասաց Ալավերդյանը՝ հավելելով, որ դա դառնում է անընդունելի երկրի համար և մեր տեղն աշխարհում դարձնում ենք ավելի խոցելի։

Ալավերդյանը նշեց, որ չէր ուզենա, որ բոլոր մեթոդները չփորձարկելով, անցում լինի դեյուրե գործընթացներին։

«Հայաստանում կա ոգևորությունը՝ ամեն ինչը տանել դատարան։ Իրականում մինչդատական գործառույթները պակաս կարևորություն չունեն»,- ընդգծեց Ալավերդյանը։

Բացի այդ՝ Ալավերդյանը նշեց, որ նախկինում եղած բոլոր փորձագետները, անգամ,եթե պայքարել են գործող իշխանությունների դեմ, նրանց կարծիքն ընկալվում է թշնամաբար։

Դիտարկմանը, որ Նիկոլ Փաշինյանը Հրայր Թովմասյանին նաև մեղադրել է հիբրիդային հեղաշրջման փորձի և օտարերկրյա կազմակերպությունների հետ կապ ունենալու մեջ, Լարիսա Ալավերդյանը պատասխանեց, որ դա պետական հանցագործության մեղադրանք է։

«Դա ասել հպանցիկ և անցնել, ես դա լուրջ չեմ համարում։ Դա որևէ մեկնաբանության ենթակա չէ»,- ասաց Ալավերդյանը՝ նշելով, որ դա պարզապես անտեղյակություն է ոչ միայն տեսականորեն, այլև՝ պրակտիկայի առումով։

Նրա խոսքով՝ պրակտիկայում հայտնի են բոլոր հիբրիդային հեղաշրջման ձևերը և Հայաստանում այդպիսինը չկար և, եթե իշխանություններին ցանկանում են հերոսացնել, ապա դրա համար կան այլ ճանապարհներ։

Հարցին, թե արդյո՞ք դա չի կարող առիթ դառնալ նոր քրեական գործի հարուցման համար, Լարիսա Ալավերդյանը պատասխանեց. «Իհարկե կարող է։ Խնդիրն այն է, որ դատական գործընթացները գալիս են այն ժամանակ, երբ սպառվում են մինչդատական մեթոդները, այնինչ՝ մեզ մոտ ուղղակի անպատասխանատու հայտարարություններից հետո մենք փորձում ենք անմիջապես անցնել դատական գործընթացների»։

Ավելի վաղ տեղեկացրել ենք, որ Նիկոլ Փաշինյանը ֆեյսբուքյան իր այսօրվա ուղիղ եթերում ներկայացրել է, թե երբ ու ինչպես է սկսվել ՍԴ նախագահի պաշտոնից Հրայր Թովմասյանի պաշտոնանկությանն ուղղված քայլերը, ըստ էության, հայտարարելով, որ այդ քայլերն իրականացվել են իր գիտությամբ ու հանձնարարությամբ։ Վերջինս մեղադրել է նաև Հրայր Թովմասյանին ՍԴ նախագահի լիազորությունները օկուպացնելու և պաշտոնեական կեղծիք կատարելու մեջ։ Ընդ որում՝ ՍԴ լիազորություններին տիրանալու դեպքի առթիվ քրեական գործը հարուցվել է ԱԺ պատգամավոր Արման Բաբաջանյանի հաղորդման հիման վրա, սակայն դրա շրջանակներում Հրայր Թովմասյանին մեղադրանք չի առաջադրվել։ Դեռևս հունվարի 3-ին ՀՔԾ պետ Սասուն Խաչատրյանը «Ազատություն» ռադիոկայանին տված հարցազրույցում ասել էր, որ Հրայր Թովմասյանը սույն գործով հարցաքննվել է վկայի դատավարական կարգավիճակով։ «Խոսել Հրայր Թովմասյանի առնչության մասին իրավաբանորեն, իրավաբանական տեսակետից կոռեկտ չէ»,- ասել էր ՀՔԾ պետը։

Հեղինակ՝ Իզաբել Սահակյան

Աղբյուր` Փաստինֆո