Փաստ ինֆո

Քաղտեխնոլոգ Արմեն Բադալյանի խոսքով՝ ՀՀ վարչապետ Նիկոլ Փաշինյանի՝կապանյան ասուլիսին արված հայտարարությունը, թե ՍԴ նախագահ Հրայր Թովմասյանը շարունակ փորձել է իրեն քծնել ու ծառայություններ առաջարկել, պրիմիտիվ մտածված սեւ փիար էր:

«Փաստինֆո»-ի հետ զրույցում քաղտեխնոլոգն ասաց, որ այսկերպ ՀՀ վարչապետը ցանկանում էր ստորացնել Հրայր Թովմասյանին՝ ցույց տալու համար, թե նրա պայքարը աթոռի համար է: Բայց, ըստ մասնագետի անգրագետ սեւ փիարն աշխատեց իր՝ Նիկոլ Փաշինյանի դեմ:

«Հասկանալի է, որ Հրայր Թովմասյանը չէր կարող հանդուրժել նման ստորացումը եւ հակառակ գործողությունն արեց՝ վարչապետին տալով 20 օր ժամանակ եւ այս իրավիճակում Փաշինյանը կամ պետք է իրեղեն ապացույցներով՝ ձայնագրությամբ, նկարահանմամբ ցույց տար , թե ինչպես է ՍԴ նախագահը քծնում իրեն կամ դա պետք է հայտարարվեր սուտ: Վարչապետը ցույց տվեց մի գրիչ, որը ոչինչ չի նշանակում»,-ասաց Արմեն Բադալյանը:

Ըստ Բադալյանի, քանի որ Փաշինյանը տեսնում է, որ ՍԴ նախագահի պաշտոնից Հրայր Թովմասյանին ազատելու եւ ՍԴ-ն գրպանային դարձնելու ջանքերը չեն հաջողում, դիմում է ցանկացած միջոցի՝ ուժայինից մինչեւ տղամարդուն ոչ հարիր՝ ստի մեթոդների:

«Եթե ու սեւ փիարը չես կարողանում օգտագործել, մի օգտագործիր: Տվյալ իրավիճակում տուժողը վարչապետն էր, դա այնքան անլուրջ է, որ անգամ քննարկելն է դժվար»,-շեշտեց Բադալյանը՝ ընդգծելով, որ այս անլրջությունը խիստ բացասաբար է ազդում ՀՀ միջազգային հեղինակության ու տնտեսության վրա:

«Ոչ մի ներդրում չկա, արդեն 2 տարին շուտով կլրանա, բայց որեւէ ներդրում չկա, այ սա է անլրջությունը: Անլրջությունը կայանում է նրանում, որ վարչապետին թվում է, թե երկիրը կարելի է ղեկավարել կիսամյակը կամ եռամսյակը մեկ ինչ-որ նոր 100 փաստ հրապարակելով: Հայաստանի արտաքին քաղաքականությունը տապալված է՝ բոլոր ուղղություններով, միայն որոշակի հայ-ռուսական հարաբերություններ կան, դատաիրավական համակարգը տապալված է, երկրի զարգացման օրակարգ չկա: Սա է այդ անլրջության արդյունքը »,-մեզ հետ զրույցում փաստեց քաղտեխնոլոգը: 

Ինչ վերաբերում է Երեւանի ավագանու «Իմ քայլը» խմբակցության անդամի կոչին՝ ուղղված ՍԴ դատավոր Հրայր Թովմասյանի դստեր ֆեյսբուքյան էջին, Արմեն Բադալյանը ասաց. «Կամ նրան ասել են, որ դա անի կամ այդ կուսակցությունում այնպիսի միջավայր է տիրում, որ արդեն բարոյական սահմաններ չունեն: Ավելի հավանական է, որ նրան ասել են դա նել՝ աղմուկը աղմուկով փոխարինելու նպատակով: Նախաձեռնությունը գուցե եւ տեղային է եղել»:

Աղբյուր` Փաստինֆո