Փաստ ինֆո

ՀՀ վարչապետ Նիկոլ Փաշինյանը ֆեյսբուքյան իր այսօրվա ուղիղ եթերում ներկայացրել է, թե երբ ու ինչպես է սկսվել ՍԴ նախագահի պաշտոնից Հրայր Թովմասյանի պաշտոնանկությանն ուղղված քայլերը, ըստ էության, հայտարարելով, որ այդ քայլերն իրականացվել են իր գիտությամբ ու հանձնարարությամբ։

«Կար իրավաբանների և մարդկանց խումբ, ովքեր մեկ-երկու անգամ ինձ դիմել ու ասել էին, որ Հրայր Թովմասյանի գտնվելը ՍԴ նախագահի պաշտոնում ապօրինի է սահմանադրական տրամաբանությամբ, բայց կա նաև այլ հանգամանք, որ վերլուծությունը ցույց է տալիս, որ այդ կոմբինացիան առանց կեղծիքների հնարավոր չէ իրականացնել»,- ասել է ՀՀ վարչապետ Նիկոլ Փաշինյանն ու ավելացրել, որ այդ տեղեկությունն իրեն հետաքրքիր է թվացել, սակայն չի հանձնարարել դրանով զբաղվել, քանի որ հունիս-հուլիս ամիսներն էին և ավելի առաջնային գործեր կային։

Փաշինյանը պատմեց, որ ամիսներ անց, երբ թերթում էր նշումների տետրը, տեսել է իրավաբանների ներկայացրած խնդիրն ու ավելի մանրամասն ուսումնասիրել այդ վերլուծությունը. «Սա ինձ համար «պրինցիպիալ» հարց էր, քանի որ ասել ենք՝ օրինականության վրա պետք հանվենք մեր գործողությունների ժամանակ։ Երբ ավելի մանրամասն տեղեկացա ինչի մասին է խոսքը, ինձ համար նույնիսկ չկար ընտրություն դրանով պետք է զբաղվեմ, թե ոչ։ Ընդ որում, մենք ՍԴ նախագահի, անդամների հետ ոչ մի խնդիր չենք ունեցել»։

Վարչապետը կրկնեց պնդումը, թե այդ ամիսների ընթացքում Հրայր Թովմասյանը նշել է՝ պատրաստ է համագործակցության, ասել է, թե ինքն է գրել Սահմանադրությունը, ՍԴ-ն նորմալ աշխատում է և այլն։

«Բայց էլի ինձ համար չի եղել հարց, որ ինչ-որ իրավիճակ պետք է օգտագործեմ նեղ, կուլիսային պայմանավորվածությունների և այլնի համար։Այդ ժամանակահատվածում էր, որ ի հայտ եկավ ՍԴ հետագա անդամ Վահե Գրիգորյանի նամակը, և թեման, որ ՍԴ նախագահի կարգավիճակն օկուպացված է՝ դարձավ հանրամատչելի։ Այն ժամանակ երբ ՍԴ նախագահի համար ակնհայտ էր, որ իշխանությունը ոչ մի կերպ չի համաձայնվում և չի համաձայնելու իր արած կեղծիքները կոծկել, այդ ժամանակվանից սկսած ՍԴ նախագահը սկսեց քաղաքական դաշտում իր համար պաշտպանություններ փնտրել ու այս ողջ պրոցեսը կուլմինացիային հասավ ապրիլ-մայիս-հունիս ժամանակաշրջանում, երբ տարբեր տեղերում, այդ թվում հանրապետությունից դուրս, պաշտպանություններ փնտրեցին, որն ուղղված էր ՀՀ պետական շահերի դեմ»,-ասաց Փաշինյանը։

Վարչապետի խոսքով, Վահե Գրիգորյանի նամակից հետո «ինֆորմացիան մեծ ծավալով հոսեց» և հարուցվեց քրեական գործ ու անառարկելորեն ապացուցվեց, որ ՍԴ նախագահի ընտրությունը ԱԺ-ում տեղի է ունեցել կեղծիքի միջոցով. «Ինչն է որ այստեղ ամենակարևորն է, եղել է 2 տրամաբանություն. Այդ փաստն օգտագործել և դրա միջոցով ՍԴ նախագահին ու ՍԴ-ն «առնել կոնտրոլի տա՞կ», թե՞ գտնվել սկզբունքային ու գնալ իրավական ճշգրիտ գնահատականների ու լուծումների ճանապարհով»։

Փաշինյանը ցուցադրեց գրիչը, որն ըստ իր գրառման, իրեն էր տվել ՍԴ նախագահն ու ասաց. «Այս գրիչն այդ ամենի սիմվոլն է, այն բանի սիմվոլն է, որ կարող էինք անել այնպիսի քայլեր, ՍԴ նախագահը լիներ այնպիսի ՍԴ նախագահ, ինչպիսին ՍԴ նախագահը եղել է իր ստեղծման առաջին օրից։ Սրա համար է կարևոր այս դետալը։ Բայց ես գնացել եմ ուրիշ ճանապարհով ու հասկացել, որ չի կարելի սիրո և համերաշխությանհեղափոխությամբ հասնել իշխանության և խնդիր դնել ունենալ խամաճիկային ՍԴ»։

Նշենք, որ ՍԴ լիազորություններին տիրանալու դեպքի առթիվ քրեական գործը հարուցվել է ԱԺ պատգամավոր Արման Բաբաջանյանի հաղորդման հիման վրա, սակայն դրա շրջանակներում Հրայր Թովմասյանին մեղադրանք չի առաջադրվել։

Աղբյուր` Փաստինֆո