Փաստ ինֆո

«ԷՅՋՎԻԷՅՋ» փաստաբանական գրասենյակի տնօրեն Վահան Հովհաննիսյանի գնահատմամբ՝ Հայաստանում այսօր առկա է ոստիկանապետություն կառուցելու վտանգ։ Նման կարծիք իրավաբանը հնչեցրել է այսօր տեղի ունեցած մամուլի ասուլիսում՝ անդրադառնալով ոստիկանությանը գաղտնալսելու հնարավորություն տալու օրենսդրական կարգավորմանը։

Նրա խոսքերով՝ ոստիկանության՝ գաղտնալսում կատարելու իրավունքի որոշման վերաբերյալ իշխանության միակ ողջամիտ պատճառաբանությունն այն է, որ դրանով փորձում են հավասարակշռել Ոսստիկանության և ԱԱԾ-ի լիազորությունները, ինչը քննադատության չի դիմանում։ Նման տրամաբանությամբ շարժվելու դեպքում, ինչպես նշեց փաստաբանը, գաղտնալսման լիազորություն պետք է տրվեր նաև Քրեակատարողական ծառայությանը, ինչը չի տրվել։

Նրա կարծիքով՝ եթե ընդունենք, որ պետությունը չունի լատենտ նպատակ ստեղծելու «ոստիկանապետություն» և չունի լատենտ նպատակ տոտալ գաղտնալսումներ իրականացնելու, ապա իրավական ողբերգություն տեղի չի ունեցել, պարզապես՝ լոկալ բնույթի տեխնիկական փոփոխություններ են կատարվել։

«Այս վերջին շրջանի իրադարձությունները հանգեցնում են նրան, որ իրականում այդպիսի վտանգ կա»,- ասաց փաստաբանը։
Վերջինս՝ առանձնացնելով օրինակները նշեց, որ ներկա գործող Քրեական օրենսգրքով և այս կատարված փոփոխություններով լիազոր մարմնի լիազորություններն ավելին են, քան անձանց իրավունքների և ազատությունների վերաբերյալ երաշխիքները, այսինքն՝ դրանք չեն հավասարակշռվում, ինչը փաստաբանի կարծիքով, կարող է հանգեցնել կամայականության։

«Օրինակ՝ անձին հնարավորություն է ընձեռնվում, որ նա կարող է ծանոթանալ իր նկատմամբ իրականցված միջոցառմանը միայն այն դեպքում, երբ իր նկատմամբ կայացվում է դատական արդարացման ակտ, կամ քրեական գործով վարույթը կարճվում է, կամ քրեական հետապնդումը դադարեցվում է։ Այն դեպքում, երբ քրեական գործով անձը չունի դատավարական կարգավիճակ կամ կոնկրետ իր նկատմամբ չեն կայացվում այդ որոշումները, ապա անձը երբևիցե իր ողջ կյանքի ընթացքում չի կարող իմանալ իր նկատմամբ այդպիսի միջոցառում իրականացվել է, թե ոչ և, եթե իրականացվել է, ապա որոնք են եղել հիմքերը»,- նշեց փաստաբանը։

Վերջինիս առանձնացրած երկրորդ դեպքն այն է, որ ներպետական օրենսդրությունը սահմանում է անձի իրավունքը՝ տեղեկանալու հետաքննության մարմնի կողմից դատարան ներկայացրած միջնորդությանը կից նյութերին տեղեկանալու հնարավորություն, այսինքն՝ պետք է իմանալ, թե ինչ հիմքով են դիմում դատարան գաղտնալսելու համար։ Մինչդեռ՝ փաստաբանը գտնում է, որ այդ իրավունքը ձևական բնույթ է կրում, քանի որ դատարանի կողմից այդ նյութերը կարող են չտրամադրվել, եթե այն պարունակում է պետական գաղտնիք։

Վահան Հովհաննիսյանի խոսքով՝ եթե գաղտնալսվում է մի անձ և վերջինս խոսում է անորոշ թվով անձանց հետ և գաղտնալսվում են այդ բոլոր անձանց՝ առանց դատարանի որոշման։ Փաստաբանը նշեց, որ պատրաստվում են դիմում ներկայացնել ՍԴ՝ այդ նորմի սահմանադրականությունը վիճարկելու համար։

Աղբյուր` Փաստինֆո