Փաստ ինֆո

ԱԺ «Իմ քայլը» խմբակցության պատգամավորներ Գևորգ Պապոյանն ու Հովիկ Աղազարյանը կարծում են, որ վարչապետի կողմից Սահմանադրական դատարանի նախագահ Հրայր Թովմասյանի «քծնանքի ու իր ծառայությունները մատուցելու փորձերի» վերաբերյալ հրապարակած փաստը սխալ ընկալում է ստացել և շեշտը դրվել է ոչ թե գրիչի լուսանկարին կից գրառման վրա, այլ հենց գրիչի փաստի վրա։

«Գրիչը որպես փաստ ներկայացնելով ու գրառմամբ վարչապետն ամեն ինչ ասել է և մեկնաբանություն չեմ տա։ Ամեն ինչ ասվել է»,-այս մասին այսօր «Փաստինֆո»-ի հետ զրույցում ասաց ԱԺ «Իմ քայլը» խմբակցության պատգամավոր Գևորգ Պապոյանը։

Նա նշեց, որ վարչապետի գրառման հետ կախված ընկալումը սխալ է, քանի որ կենտրոնացումը գրիչի վրա է և ոչ թե գրառման։
«Ես խորանում եմ գրառման բովանդակության մեջ, իսկ Դուք՝ գրիչի։ Մենք տարբեր կերպ ենք ընկալել»,-ասաց Պապոյանը։

Արձագանքելով Ազգային անվտանգության ծառայության նախկին տնօրեն Արթուր Վանեցյանի գրառմանը, թե «Իշխող կուսակցությունը պետք է քննարկի վարչապետի նոր թեկնածու առաջադրելու հարցը»՝ «Իմ քայլը» խմբակցության պատգամավորն ասաց. « «Իմ քայլը» խմբակցությունը ժպտում է այդ գրառման հետ կապված»։

Նույն խմբակցության պատգամավոր Հովիկ Աղազարյանն էլ Վանեցյանին հորդորեց ավելի նրբանկատ լինել իր հայտարարություններում։
Աղազարյանն իր հերթին անդրադառնալով վարչապետի՝ Թովմասյանի «քծնանքի» հետ կապված փաստին, ասաց, որ կարևոր է որպես փաստ դիտարկել գրիչին կից առկա մեկնաբանությունը։

«Խոսքը միայն գրիչի մասին չէ, այլ դրա պատմությանը, թե ինչպես է այն հայտնվել վարչապետի մոտ։ Չեխովի պատմությունները հիշեք և կտեսնեք, թե ինչ զուգահեռներ է անցկացվում»,-ասաց Աղազարյանը։

Հարցին, արդյոք սա վարչապետի մակարդակով հնչեցնելու արժանի փաստ էր, «Իմ քայլը» պատգամավորը պատասխանեց. «Դե հիմա ես գնահատական չեմ կարող տալ, որովհետև մանրամասն չգիտեմ՝ ինչ է տեղի ունեցել Հրայր Թովմասյանի և վարչապետի միջև։ Հետևաբար, դժվար է ասել՝ ինչ անցած երևույթներ են եղել։ Վարչապետը կարող է դա մեկնաբանել»։

Հիշեցնենք, որ Կապանում տեղի ունեցած մամուլի ասուլիսի ժամանակ ՀՀ վարչապետ Նիկոլ Փաշինյանը հայտարարեց, որ «ՍԴ նախագահ Հրայր Թովմասյանի մայիսից սկսած ամենօրյա ռեժիմով, հետո՝ ամենշաբաթյա ռեժիմով, հետո՝ ամենամսյա ռեժիմով, իր ծառայություններն է առաջարկել ինձ, ասելով, որ «քանի որ ես եմ Սահմանադրության էս տեքստի հեղինակը, և ես Ձեզ կարող եմ պատմել բոլոր խութերի մասին, և մենք կարող ենք իրար հետ անել չգիտեմ ինչեր, ինչեր, ինչեր»։

Փաշինյանի այս հայտարարությանն արձագանքել էր Հրայր Թովմասյանն ու պնդել, որ իր պաշտոնավարման ընթացքում որևէ առաջարկություն չի ներկայացրել Փաշինյանին կամ իշխանության որևէ այլ ներկայացուցչի։ Թովմասյանը վարչապետին 20 օր ժամանակ էր տվել, որպեսզի նա հրապարակի իր հայտարարությունները հիմնավորող որևէ օբյեկտիվ փաստ, վստահելի ապացույց, հակառակ դեպքում ՍԴ նախագահը Փաշինյանի զրպարտության վերաբերյալ հայց կներկայացնի դատարան։

Ի պատասխան Նիկոլ Փաշինյանը հրապարակել էր գրիչի լուսանկար, որին կից գրել. «Վարչապետ ընտրվելուց հետո Հրայր Թովմասյանին առաջին անգամ հանդիպել եմ 2018թ. մայիսին կայացած «Հայաստան» համահայկական հիմնադրամի հոգաբարձուների խորհրդի նիստում։ Ինձ տարօրինակ թվաց պարոն Թովմասյանի ակնհայտ շողոքորթ պահվածքն իմ նկատմամբ, մի մարդու, ում գործողությունների արդյունքում իր երկարամյա քաղաքական թիմը ընդամենը օրեր առաջ ջախջախվել էր:

Ինձ դիմում էր բացառապես «պարոն Փաշինյան ջան», «պարոն վարչապետ ջան» ձեւերով: Էդ «ջաները» ականջս սղոցում են մինչեւ հիմա: Ի դեպ, մեր շփման ողջ պատմության ընթացքում այլ կերպ ինձ չի դիմել. բացառապես «ջան»-երով:

Հետո՝ հանկարծ հիշեց եւ կարեւոր համարեց ընդգծել, որ Իջեւանի փեսա է:

Հետո՝ նշում պետք է անեի, գրիչս չէի գտնում, չեմ հիշում՝ ես ուզեցի թե ինքը նկատեց, որ գրիչ եմ փնտրում, իր այս «էլիտար» գրիչը առաջարկեց:

Գրառումներս արեցի, ելույթ ունեցա ու գրիչն իրեն վերադարձնելու փորձերս պատմություն դարձան: Թե բա՝ դա ձեր գրիչն է, շատ եմ խնդրում վերցրեք, ինչ կլինի եւ այլն։ Արդեն տեսախցիկների առաջ անհարմար պատմություն էր դառնում:

Կարճ ասած՝ այս գրիչը մնաց մոտս որպես «հավատարմության առհավատչյա»: Հիմա մտածում եմ՝ այն ժամանակ գրիչը վերցնելիս ենթագիտակցությունս է աշխատել՝ այսօր «առարկայական փաստ» ունենալու համար:

Ինչեւէ, հետո սկսեցին ինձ մոտ ընդունելության գալու հայտերը: Չընդունեցի:

Վարչապետի կողմից «հուժկու փաստարկներ» հրապարակվելուց հետո հայտնի դարձավ, որ Հրայր Թովմասյանը դիմել է փաստաբաններին ընդդեմ

Փաշինյանի հայցադիմում պատրաստելու համար։

Հեղինակ՝ Սոնա Գեւորգյան

Աղբյուր` Փաստինֆո