Փաստ ինֆո

Լոռու մարզի ընդհանուր իրավասության դատարանը պարտավորեցրել է քաղաքացուն ներողություն խնդրել Լոռու մարզպետից` ֆեյսբուքյան մեկնաբանության համար:

Լոռու մարզպետ Ա.Ղուկասյանը դիմել էր դատարան` պահանջելով պարտավորեցնել բնակչուհուն հրապարակային ներողություն խնդրել` իր վերաբերյալ սոցիալական ցանցում արված մեկնաբանությունների համար: Մասնավորապես` օգտատերը` ֆեյսբուքյան իր էջում տեղադրել էր այսուհետ հրապարակային ու թափանցիկ աշխատելու մարզպետի հայտարարության մասին պատմող տեսանյութը` հետևյալ գրառմամբ. «Աչքերդ թաքցնում ես, դիմախաղդ էլ դուրս չի գալիս Ախր, բոլ-բոլ պարգևատրել ես խորհրդականներիդ, օգնականներիդ: Ասա´ վրեդ մի քիչ աշխատեն, որ ասածներդ մի քիչ ազդեցիկ լինեն, ջանա~»:

Բացի այդ՝ նաեւ որպես մեկնաբանություն գրառել էր. «Լուս ջան, դա էլ մի կողմից, բայց ես իր հոգեվիճակը խորությամբ զգում եմ: Հայացքից, դիմախաղից ամեն ինչ կռահել կարելի է, սրտին դանակ խրես՝ արյուն չի կաթի: Մտահոգ է, քանզի չի հասցրել բոլորին պարգևատրել: Գործի մեջտեղից կոկորդը բռնել ենք, չգիտի առաջ գնա, թե հետ: Մի քանի ուղղորդվածներ մինչ կհասցնեն «շեղել» մարդկանց ուշադրությունը՝ շտապ-շտապ մյուսներին էլ խրախճանքի մասնակից կդարձնի: Ասել եմ ու նորից կասեմ ո~չ վայելեք այդ գումարները, հատ առ հատ քթներից գալու է: Ձեզնից ոչ մեկը արժանի չի հավելյալ գումարի, անգամ բարձր աշխատավարձի, որ ամեն ամիս հենց այնպես նվիրվում է մեր գրպանից ձեզնման անարժաններին: Ձեզնից խելացիները տանը նստած ու անորոշ վիճակում, իսկ ձեզ նման բոմժերը պահը բաց չեն թողնում ու սկսում են խոզի նման լափել: Թու՝ ձեր նամուսին, եթե ունեք էլ»: Մարզպետը գտել է, որ ֆեյսբուքյան այս գրառումները պարունակում են վիրավորանք, իսկ մասնավորապես Անդրեյ Ղուկասյանի հասցեին հնչեցված՝ «իսկ ձեզ նման բոմժերը պահը բաց չեն թողնում ու սկսում են խոզի նման լափել» արտահայտությունը` պատիվը և արժանապատվությունը վիրավորող հայտարարություն է: Մինչդեռ պատասխանող կողմը՝ օգտատերը, հայտարարել է, որ իր՝ 9 նախադասությունից կազմված մեկնաբանությունից միայն առաջին հինգն է վերաբերել Լոռու մարզպետին, իսկ մնացած չորսը հայցվորին չեն վերաբերել, ինչի հիմքով էլ խնդրել է դատարանից մերժել հայցը։

Սակայն դատարանը վճռել է բավարարել մարզպետի հայցը ու պարտավորեցրել օգտատիրոջը` նույն եղանակով 5-օրյա ժամկետում ներողություն խնդրել:

«Փաստինֆո»-ի հաղորդմամբ` օգտատերը վերաքննիչ բողոք է ներկայացրել` Լոռու մարզի ընդհանուր իրավասության դատարանի այս որոշման դեմ: Հունվարի 24-ին գործը մակագրվել է քաղաքացիական վերաքննիչ դատարանի դատավորներ Տարոն Նազարյանին, Հարությու Ենոքյանին, Նարինե Բարսեղյանին:

Հեղինակ` Իզաբել Սահակյան

Աղբյուր` Փաստինֆո