Փաստ ինֆո

Ես ոչ մեկից ոչ ուզում եմ ազատվել, ոչ ուզում եմ՝ չազատվել։ Այս մասին հրավիրված ասուլիսին ասել է վարչապետ Նիկոլ Փաշինյանը՝ ՍԴ դատավորներից ազատվելու մասին հարցին։

«Ես ուզում եմ, որ ՀՀ-ն ազատվի կոռումպացված համակարգի բոլոր մնացորդներից, ուզում եմ, որ ՀՀ-ում լինի իրապես անկախ դատական համակարգ և ոչ թե այնպիսի դատական համակարգ, որ օգտվի նրանից, որ գործող վարչապետը կամ կառավարությունը իրենց բան չեն անում, հարկադրանքի չեն ենթարկում, իրենք գնան ուրիշ տեղերից իրենց համար հարկադրողներ և թելադրողներ գտնեն »,- ասաց Փաշինյանը՝ հավելելով, որ եղան նաև էմոցիոնալ դրսևորումներ, բայց ՀՀ դատական համակարգը ցույց տվեց, որ անցնում է առողջացման ճանապարհը և ՀՀ դատական համակարգում կան դատավորներ, ներառյալ՝ ՍԴ-ում, որոնք չեն ներքաշվել այն խարդավանքների մեջ, որոնց փորձել են ներքաշել։

Փաշինյանն ընդգծեց, որ հույս ունի, որ նրանք չեն մտնի սեփական ժողովրդի և երկրի դեմ պատերազմելու՝ ոմանց օրակարգի մեջ և ՍԴ անդամի բարձր կարգավիճակը ենթադրում է, որ վճռական պահերին պետք է սկզբունքային գտնվեն և դուրս չգան սեփական ժողովրդի դեմ, ժողովրդի ապագայի դեմ։

Վարչապետն իր բերած օրինակում նշեց, որ հնարավոր է մարմինները ստանան ինչ-որ տեղեկություն, որ ինչ որ անձ կապ ունի օտարերկրյա հատուկ ծառայությունների հետ։

«Հիմա ինչ պետք է ասենք՝ վայ պատգամավոր է, իրենով չհետաքրքրվենք, տեսնենք այդ փաստը ճիշտ է, թե ոչ»,- ասաց Փաշինյանը։

Աղբյուր` Փաստինֆո