Փաստ ինֆո

Հանձնաժողովը նիստն անում է այն պարբերականությամբ, ինչ անհրաժեշտ է, բայց ամենօրյա ռեժիմով այդ թեմայով աշխատանք է արվում։ Այս մասին ասաց ՀՀ վարչապետ Նիկոլ Փաշինյանը՝ պատասխանելով հարցին, թե ինչու Գյումրիի տնակների հաշվառմամբ զբաղվող հանձնաժողովն ավելի քան երեք ամիս նիստ չի հրավիրել։

«Աշխատանքն անում է Կադաստրի կոմիտեն, ոստիկանությունը, Տարածքային կառավարման նախարարությունը, քաղաքաշինության կոմիտեն ամենօրյա ռեժիմով։ Վերցնում են բոլոր տնակները, հատ-հատ քարտեզագրում են, էլեկտրոնային տեղորոշում են և ստեղծում են այդ տնակի պատմությունը. Սա ինչ տնակ է, այդտեղ մարդ ապրում է, թե ոչ, եթե չի ապրում ինչ-որ մեկը, որտեղ է և ինչ կարգավիճակ ունի և եթե ապրում է՝ ինչու է այդտեղ ապրում»,-ասաց վարչապետը։

Վերջինս նկատեց՝ եթե պարզվի, որ այդ տնակում ապրում է մի մարդ, որը Գյումրիի հարևան գյուղերից մեկում ունի տուն, և դա թողել է ու տնակում է ապրում, որովհետև տեսել է հնարավորություն ուղղակի, ինչու՞ պետք է նրան բնակարանի գնման վկայագիր տան։

Դիտարկմանը, թե 2850 տնակներում քանիսն են համապատասխանում անօթևանների չափորոշիչներին, և որ ծրագրով են նրանց բնակարաններ տրամադրելու, վարչապետն արձագանքեց. «Մի րոպե, բայց կարող է պարզվի, որ այնտեղ ոչ մեկի նկատմամբ պետությունը պարտավորություն չունի։ Ես ասում եմ, որ այս տարվա 3 մլրդ ծրագրով լուծում ենք այն բոլոր քաղաքացիների հարցը, ում նկատմամբ պետությունը ունի դե յուրե արձանագրված պարտավորություն։ Բա կարող մի մարդ պետությունից ստացելա բնակարան, հետո գնացել կազինոյում խաղացել, պարտվելա, տունը կորցրել ու եկել տնակում են ապրում։ Իսկ ինչու՞ պետք է բնակարան տանք։ Մենք հիմա ՀՀ բոլոր քաղաքացիներին, ովքեր կազինոյում պարտվել են և բնակարան են վաճառել, իրենց տուն ե՞նք տալիս։ Չէ, չէ՞»,-նշեց վարչապետը՝ ընդգծելով, որ երբ արձանագրվի դեպք, որ կան մարդիկ, որոնք պետք է ստանային, բայց չեն ստացել, կհաշվառեն։

Վարչապետի խոսքով նման դեպքերում պետությունը գումարը կտա՝ պայմանով, որ նույն պահին տանկը քանդվի և իրենք այդտեղից դուրս գան։

Աղբյուր` Փաստինֆո