Փաստ ինֆո

Նիկոլ Փաշինյանն անդրադարձել  է  «Լուսավոր Հայաստանի» նախաձեռնությամբ ԱԺ քննիչ հանձնաժողովի ստեղծման նախաձեռնության տապալման մասին հարցին։

Վարչապետը կրկնել է ԱԺ-ում հնչեցրած միտքը, թե Երեւանի քաղաքապետարանի տիրույթում գտնվող հարցերի վերաբերյալ քննիչ հանձնաժողով ստեղծելու լիազորությունը Երեւանի ավագանուն է պատկանում եւ կարեւորել է իշխանության տարանջատման սկզբունքը։

«Կամազները կարողա՞ Հայկ Մարությանն իր պապի համար է առել, քաղաքին է չէ՞ ծառայում»,-հայտարարել է Փաշինյանը՝ հավելելով, որ ամենաժողովրդավարական երկրներում էլ կա այդպիսի պրակտիկա։

Փաշինյանն ասել է, որ դատախազությունն ուսումնասիրել է հարցը, արձանագրել, որ իրավախախտում չկա, բայց պետք է կանոնակարգել։ Վարչապետն ասաց, որ ինքն էլ է համաձայն, որ կանոնակարգման խնդիր կա։

«Ես ցավում եմ, որ պարոն Մարուքյանը չի կարողանում տարբերել, որ ասում ենք անցյալում է մնացել ինչ նկատի ունի, նկատի ունի, որ պարոն Մարուքյանը տեղը չի բերում, որ Հայկ Մարությանը Տարոն Մարգարյանը չի, ես Սերժ  Սարգսյանը չեմ։ Ենթադրում եմ ՝ Լենա Նազարյանը սա է նկատի ունեցել, որ չի կարելի ժողովրդի վստահության քվեն ունեցող իշխանության հետ էդ ձեւով խոսալ»,-հայտարարել է Նիկոլ Փաշինյանը՝ անդրադառնալով վերջին օրերին խորհրդարանում ԼՀԿ-«Իմ քայլը» բանավեճի ընթացքում հնչած հայտարարություններին։

Հիշեցնենք, որ ԱԺ նախագահի տեղակալ Լենա Նազարյանն ասել է, որ «Լուսավոր Հայաստան» խմբակցությունն ուղղակի խցանվել է անցյալում, և խորհուրդ է տվել ելք գտնել անցյալի ձևերից, հրաժարվել անցյալի չափանիշերից:

Անդրադառնալով Էդմոն Մարուքյանի հայտարարությանը, թե իշխող խմբակցությունը  կորցնում է իր կրեդիտները, Փաշինյանը ասել է, թե  ով քաղաքական կրեդիտից խոսա, թող մեր որոշ գործընկերներ տանձից, խնձորից, ուրիշ բաներից խոսեն.«Եթե պարոն Մարուքյանը շարունակելու է տեղը չբերել, ինքը հայտնվելու է Արմեն Աշոտյանի դերում, ինքը թող ընտրի, մենք որեւէ պրոբլեմ չունենք։ Ինքը չի կարող գնահատել՝ մենք մեր քաղաքական կրեդիտը կորցնում ենք, թե չենք կորցնում, դրա գնահատողը ժողովուրդն է, եւ հերիք ա մեր համեստությունը չարաշահել»։

Փաշինյանն ասաց, թե 2015, 2016, 2017 թվականները չեն, որ հնարավոր լինի իշխանության հետ շանտաժով ու առեւտրով խոսել։ «Ինքնաոչնչացմամբ են զբաղված այդ մարդիկ, թող մեր քաղաքական կրեդիտի մասին չանհանգստանան»։

Լրագրողը հետաքրքրվեց, թե Արմեն Աշոտյանի ո՞ր դերը նկատի ուներ վարչապետը, Փաշինյանը արձագանքեց.«Ստեղծագործական»։

Աղբյուր` Փաստինֆո