Փաստ ինֆո

Սկսել են թեժ շրջանառել, որ Սերժ Սարգսյանի ժառանգությունը Ղարաբաղի հարցում, այդ «գյոզալ» ժառանգությունն այս իշխանությունը կորցրեց։ Մամուլի ասուլիսի ժամանակ ասել է ՀՀ վարչապետ Նիկոլ Փաշինյանը։

Նա նկատեց՝ հնարավորություն է ընձեռնվել՝ ծանոթանալու Ղարաբաղի հարցում Սերժ Սարգսյանի թողած ժառանգությանը, այնուհետև հեռախոսից ընթերցեց մի հրապարակում, թե Սերժ Սարգսյանը որ կետում է թողել Ղարաբաղի բանակցային գործընթացը. «Համենայն դեպս նախորդ իշխանության ներկայացուցիչների կողմից պաշտոնական հերքումներ չեղան։ Կարծում եմ՝ այդ փաստի բերումը կարող ենք ֆիքսել, թե Սերժ Սարգսյանը բովանդակային ինչ է թողել սեղանին Ղարաբաղի հարցի վերաբերյալ»,-ասաց վարչապետը և սկսեց ընթերցել.

«Պարբերություն 1

1. Լեռնային Ղարաբաղի հակամարտության համապարփակ կարգավորման վերջնական նպատակներն են այնպես, ինչպես նրանք կապված են միմյանց հետ։ Յոթ շրջանների՝ Աղդամի, Ֆիզուլիի, Ջեբրաիլի, Զանգելանի, Ղուբաթլիի, Քելբաջարի և Լաչինի վերադարձն Ադրբեջանին, պայմանով, որ պահպանվում է Լեռնային Ղարաբաղը Հայաստանին կապող միջանցքը։

2. Կողմերի միջև համաձայնեցված ժամկետներում ՄԱԿ-ի կամ ԵԱՀԿ-ի հովանու ներքո Լեռնային Ղարաբաղի ողջ բնակչության ազատ կամարտահայտությունը հանդիսացող համընդհանուր քվեարկության անցկացման միջոցով, Լեռնային Ղարաբաղի վերջնական իրավական կարգավիճակի որոշումը, որը կլինի իրավական առումով պարտադիր և կհամապատասխանի միջազգային իրավունքի նորմերին և սկզբունքներին՝ նկատի ունենալով, որ քվեարկության դրված հարցը կամ հարցերը չպետք է սահմանափակվեն և կարող են ներառել կարգավիճակին վերաբերող բոլոր տարբերակները։

Տարածաշրջանում քաղաքական, առևտրային, տնտեսական և հումանիտար կապերի ամբողջական կարգավորում։ Դրացիական համագործակցության վերականգնում, Հարավային Կովկասի տարածաշրջանի ամբողջական կայունության ապահովում։

Պարբերություն 2

Վերաբնակները միջազգային հանրության օժանդակությամբ լքելու են առաջին պարբերությունում նշված հինգ շրջանների տարածքները։ Ադրբեջանի Քաղաքացիական իշխանությունները մտնելու են նշված տարածքները այն բանից հետո, երբ կտեղակայվեն խաղաղապահ միջազգային ուժերը և դուրս կհանվեն այդ շրջաններում ներկայումս գտնվող զինված ուժերը։ Խաղաղապահ միջազգային ուժերը կտեղակայվեն նախկին Լեռնային Ղարաբաղի ինքնավար շրջանի վարչական սահմանների երկայնքով, բացառությամբ Քելբաջարի և Լաչինի շրջանների մաս կազմող հատվածների։ Քելբաջարի շրջանը կմնա ԵԱՀԿ անցումային մշտադիտարկման տակ։

Պարբերություն 3

Միևնույն ժամանակ, վերոնշյալ միջոցների ձեռնարկմանը զուգահեռ, մինչ վերջնական կարգավիճակի որոշումը, Լեռնային Ղարաբաղը պետք է օժտվի ժամանակավոր կարգավիճակով, որը կերաշխավորի նրա ամենօրյա կենսագործունեության կազմակերպումը»,-նշեց վարչապետը՝ հավելելով, որ ըստ այս հրապարակման, որը չի հերքվել, սա այն ժառանգությունն է, որն առկա է եղել սեղանին։

«Հիմա մեզ մեղադրում են, որ մենք այս ժառանգությունը կորցրել ենք։ Ուզում եմ ասել հետևյալը, որ պահին հենց էս նույն կետից ՀՀ-ն ուզենա շարունակել բանակցությունները, միջազգային հանրությունը ոչ մի պրոբլեմ չի ստեղծի։ Արցախի նախագահի բոլոր թեկնածուները թող ասեն՝ այս տեքստն իրենց համար ընդունելի է, թե ընդունելի չէ։ Թող Արցախի ժողովուրդն ասի էս տեքստն իր համար ընդունելի է, թե ընդունելի չի։ Եթե Ձեզ կհավատացնեն, որ սա կորսվածա, Ձեզ խաբում են։ Եթե Արցախի ժողովուրդը կորոշի, որ սա է այն բանակցությունների հիմքը, սա է ընդունելի տարբերակը, ես երաշխավորում եմ, որ նույն պահին սա կհայտնվի բանակցային սեղանի շուրջ։ Բացարձակ ոչ մի պրոբլեմ չենք ունենա։ Հիմա առաջարկում եմ և պնդում եմ, որ Արցախի նախագահի բոլոր թեկնածուներն ասեն՝ սա իրենց համար ընդունելի՞ է, թե՞ ընդունելի չէ։ Սա կարևոր շեշտադրում է, որպեսզի շահարկումներ չլինեն»,-հավելեց Նիկոլ Փաշինյանը։

Աղբյուր` Փաստինֆո