Փաստ ինֆո

Ձեր կյանքի փոփոխությունն այն է, որ այսօր կարող եք, 50 եվրո տաք, թռնեք Հռոմ ու հետ գաք։ Այս մասին այսօր մամուլի ասուլիսի ժամանակ ասաց ՀՀ վարչապետ Նիկոլ Փաշինյանը՝ ընդգծելով, որ ավիացիայի ոլորտում այս փոփոխությունը տեղի է ունեցել ի հեճուկս քաղաքացիական ավիացիայի կոմիտեի։

«Այն պահից, երբ Տաթևիկ Ռևազյանը նշանակվել է կոմիտեի ղեկավար, առաջին օրից սկսվել է ամենաստոր լրատվական արշավն այդ կնոջ նկատմամբ, որոնք 90 և ավել տոկոսով կազմակերպված են եղել ներսի պաշտոնյաների կողմից։ Ընդ որում այս փոփոխությունները տեղի են ունեցել ի հեճուկս ամբողջ քաղաքացիական ավիացիայի ավանդական գիլդիայի։ Ինձ գրում էին՝ գնում, խայտառակում է մեր երկիրը։ Գնում է Ryanair-ի պահակի հետ է հանդիպում, գալիս Ձեզ ներկայացնում է, թե ինքը որևէ պաշտոնյայի հետ է հանդիպել։ Մարդիկ ծիծաղում են մեզ վրա։ Ազգային անվտանգության հարց ներկայացնող հարցերը չեն զեկուցել կոմիտեի ղեկավարին։ Սա պարզ օրինակ է, թե ինչպես են փոփոխությունները տեղի ունենում ի հեճուկս պետական կառավարման համակարգի»,-նշեց Նիկոլ Փաշինյանը՝ նկատելով, որ ավիացիայի ոլորտի այս փոփոխությունները տեղի են ունեցել ի հեճուկս այդ ոլորտի պաշտոնական շրջանակների և նրանց շրջապատող մասնագիտական շրջանակների։

Վարչապետի խոսքով վերջիններս ինչով կարողացել խանգարել են. «Որտեղ կարողացել են անիվների մեջ փայտ են մտցրել։ Եվ ես անկեղծ ասած Տաթևիկ Ռևազյանին ասում եմ, որ զարմանում եմ՝ մինչև հիմա, չնայած այդ մարդկանց մի մասին իմ նախաձեռնությամբ ոչ միայն աշխատանքից եմ հանել, այլև համակարգից եմ հեռացրել ու ասել՝ չտեսնեմ, որ նրանցից մեկը մոտենա պետական կառավարման համակարգին։ Բայց զարմանում եմ, որ Տաթևիկ Ռևազյանը շատերին ներողամիտ է վերաբերում»,-հավելեց վարչապետը։

Աղբյուր` Փաստինֆո