Փաստ ինֆո

Քաղաքական թիմն անհատների, ազատ մարդկանց քաղաքական թիմ է և քննարկումների ընթացքում դրվագներ է լինում ես եմ դժգոհություն հայտնում կամ իրենք են դժգոհություն հայտնում։ Այս մասին հրավիրված ասուլիսին ասել է վարչապետ Նիկոլ Փաշինյանը՝ անդրադառնալով ներկուսակցական դժգոհությունների մասին հարցին։

«Բա ի՞նչ։ Մենք սովոր ենք նրան, որ ոչ մի քննարկում չկա, ոչ մի բողոք չկա, բոլորը գոհ են, երջանիկ են։ Դրա՞ն ենք սովոր։ Չկա նման բան»,- նշեց Փաշինյանը։
Նրա խոսքով՝ ինքն իր աշխատանքից երբեք գոհ չի եղել և չի լինի, ինչը քչացնում է հավանականությունը, որ ուրիշի աշխատանքից շատ-շատ գոհ կլինի, սակայն ուրիշի աշխատանքից շատ ավելի գոհ կլինի, քան իր աշխատանքից։

Փաշինյանն ասաց, որ ԱԺ և «Իմ քայլը» խմբակցության աշխատանքի մասին ամենապերճախոս գնահատականը տվել է Ադրբեջանի նախագահը, ով լուծարել է իր երկրի խորհրդարանը, ըստ էության՝ ընդունելով, որ իրենց երկրի խորհրդարանը չի համապատասխանում ժամանակակից պահանջներին և խնդիր է դրել, որ Ադրբեջանի խորհրդարանում պետք է լինեն երիտասարդ մարդիկ, ում կրթական ցենզն ավելի բարձր կլինի, ով միջազգային ատյաններում ավելի հաղորդակցվող և ընկալելի կլինեն։

«Այս պահանջն ըստ ձեզ որտեղի՞ց է առաջացել։ Առաջացել է Հայաստանի խորհրդարանի և մասնավորապես՝ խորհրդարանական մեծամասնության գործունեությանը՝ այդ թվում միջազգային գործունեությանը հետևելու արդյունքում։ Առաջացել է Հայաստանի միջազգային իմիջի փոփոխության արդյունքում» ,- ասաց Փաշինյանը՝ հավելելով. «Այսօրվա խորհրդարանն իր ինտելեկտուալ մակարդակով և խորհրդարանական մեծամասնությունը կարելի է համեմատել նախո՞րդ խորհրդարանական մեծամասնության հետ։ Իհարկե, չի կարելի համեմատել։ Համեմատության եզր ուղղակի չկա»։

Ինչ վերաբերում է արտահերթ խորհրդարանական ընտրություններին, Փաշինյանն ասաց. «Որտե՞ղ եք տեսել, որ դրա որևէ քաղաքական նախադրյալ չլինի և հանկարծ որևէ մեկը որոշի արտահերթ խորհրդարանական ընտրություն։ Դա հո խաղ ու պար չի»։

Աղբյուր` Փաստինֆո