Փաստ ինֆո

«Արմեն Գրիգորյանը հենց կոնկրետ այդպիսի հայտարարություն չի արել, նա տվել է ձևակերպումներ, որոնք լրագրողին բերել են այդպիսի եզրակացության, սրանք տարբեր են»,- լրագրողների հետ հանդիպմանը հայտարարեց ՀՀ վարչապետ Նիկոլ Փաշինյանը՝ անդրադառնալով պետական հեղաշրջման փորձի մասին Անվտանգության խորհրդի քարտուղար Արմեն Գրիգորյանի հայտարարությանը։

Ըստ Փաշինյանի, ԱԽ քարտուղար Արմեն Գրիգորյանի հայտարարության դեպքում գործ ունենք ժամանակակից լրատվության մի ֆենոմենի հետ, որը կոչվում է վերնագրային ընթերցում, երբ մարդիկ սովորաբար ոչ թե նյութն են կարդում, այլ՝ վերնագիրը։

Փաշինյանն ասաց, թե հեղաշրջում, պետական հեղաշրջում, պատերազմ ու այս կարգի հասկացությունները ժամանակի ընթացքում փոփոխություններ են կրում։ «Ժամանակակից աշխարհում կա հիբրիդային պատերազմ տերմինը, ինչը նշանակում է, որ պատերազմը ընթանում է, բայց այդ պատերազմը ոչ մեկ չի նկատում եւ իրականում պատերազմային պարամետրերով չկա։ Եթե Արմեն Գրիգորյանի հայտարարությունները ճշգրիտ ձևակերպենք, կարող ենք մեկնաբանել որպես հիբրիդային ինչ-որ երևույթի նկարագրություն եւ եթե էդպես ձեւակերպենք, կարող ենք նաև դա անվանել հիբրիդային հեղաշրջման հիբրիդային նախապատրաստություններ, եւ հիմա մենք կարող ենք դրա մասին խոսել, որովհետև այդ պրոցեսը լիարժեք ու վերջնականորեն պարտված է ու ջախջախված», - հայտարարեց Փաշինյանը։

Վարչապետը բացատրեց՝ հիբրիդային հեղաշրջում ասելով նկատի ունի, որ, օրինակ, տասնյակ միլիոնավոր դոլարներ են ծախսվում լրատվամիջոցներում, սոցցանցերով ՀՀ ղեկավարին, նրա ընտանիքի անդամների, բարձրաստիճան պաշտոնյաների մասին սուտ տեղեկություններ տարածելու համար։
«Ընդ որում՝ դա արվում է՝ ներգրավվելով քրեական աշխարհը, տարբեր ուժեր, կոռումպացված դեմքերի, եւ ինչո՞ւ է հեղաշրջում բառը էս պրոցեսի մեջ տեղավորվում, որովհետև հընթացս այդ պրոցեսի մեջ ներգրավվում են նաև գործող պաշտոնյաներ, որոնք լինելով իշխանության ներսում՝ գործում են ընդդեմ իշխանության, ընդ որում, դրա մեջ ներգրավված են լինում նախկին պաշտոնյաներ, դատական համակարգի որոշ պաշտոնյաներ, ընդ որում, մի ժամանակ կար, որ ես մտածում էի, որ ողջ դատական համակարգն է, բայց, փառք աստծո, ժամանակը ցույց տվեց, բայց փառք Աստծո, ժամանակը ցույց տվեց, որ ոչ, ամենևին էդպես չէ, այլ առանձին փոքր խմբեր են։ Սահմանադրական դատարանը, կոնկրետ պաշտոն օկուպացրած որոշ պաշտոնյաներ, որոնք փորձել են ՍԴ մյուս անդամներին նույնպես ներգրավվել այդ պրոցեսի մեջ, բայց ես ուրախ եմ արձանագրել, որ, կարծես թե, ՍԴ անդամների 80 տոկոսն այդ պրոցեսի մեջ չի ներգրավվել»,-հայտարարեց Փաշինյանը։

Ապա զգուշացրեց, թե մենակ չասեք՝ տվեք անուններ.«Ես տվեցի անուններ, ուղղակի թույլ տվեք ինձ կոնկրետ անուն-ազգանուններ արտասանելու տհաճությունից ազատվել։ Սա է այս պրոցեսի մասը, կոնկրետ դատական պրոցեսներ, օրումեջ տարբեր օտարերկրյա մայրաքաղաքներ այցելություններ եւ կոնսպիրատիվ հանդիպումներ, հանդիպումներ, միջազգային կազմակերպությունների հետ հանդիպումներ, այն հեղինակավոր կազմակերպությունների ու կոնկրետ ղեկավարների, որոնք երկար տարիներ Եվրոպայից սպասարկել են ՀՀ կոռումպացված իշխանությանը, շատ հնազանդ սպասարկել են ՀՀ կոռումպացված իշխանությանը ու իշխանության բռնազավթման կոնկրետ կետերի համահեղինակներ են, որովհետեւ լռել են եւ նրանց լռությունն անվճա՞ր է եղել, հնարավոր է, գա ժամանակը, մենք էս թեմաներին էլ անդրադառնանք», - հայտարարեց ՀՀ վարչապետը։
Փաշինյանն ասաց, որ ՀՀ անվտանգության մարմինները զբաղվում են եւ շարունակելու են զբաղվել այս ամենով։ «Երբ որ ապացույցները լինեն բավարար, որ մարդիկ ենթարկվեն քրեական պատասխանատվության դրա համար, մարդիկ կենթարկվեն քրեական պատասխանատվության,բայց այդ պրոցեսի ամբողջ նպատակը այն չի եղել, որ ինչ-որ մարդկանց դատել, այլ նպատակն այն է, որ ՀՀ ազգային անվտանգությանը սպառնացող վտանգները չեզոքացվեն, ու այդ վտանգները չեզոքացված են, վաղուց, արդեն մի քանի ամիս», - ասաց ՀՀ վարչապետը ու նշեց, թե ՀՀ քաղաքացիների 90 տոկոսն այդ վտանգը ոչ տեսել է, ոչ նկատել։

«Որպեսզի տարընթերցումներ չլինեն, այո ասեմ, որ իրավապահ համակարգը, ՀՀ անվտանգության մարմինները իքս պահից սկսած գործել են շատ էֆեկտիվ եւ արդյունավետ եւ ես ուզում եմ այդ էֆեկտիվության համար առանձնահատուկ գնահատականի խոսքեր ասել ՀՀ ԱԱԾ-ին, ՀՀ ոստիկանությանը, իրավապահ համակարգի մյուս ներկայացուցիչներին»,-եզրափակեց Փաշինյանը։

Նշենք, որ պետական հեղաշրջման փորձի մասին վարչապետ Փաշինյանի ընտանիքում տպագրված հայտնի հոդվածից հետո առաջինը խոսել էր իշխող ԱԺ «Իմ քայլը» խմբակցության պատգամավոր, վարչապետի տիկին Աննա Հակոբյանի եղբայր Հրաչյա Հակոբյանը՝ Ֆակտոր.ամ-ի եթերում հայտարարելով, թե ԱԱԾ նախկին տնօրեն Արթուր Վանեցյանի՝ պաշտոնից ազատելու պատճառը հեղաշրջման նախապատրաստումն էր և այդ նպատակով Նիկոլ Փաշինյանի ընտանիքի անդամների, մասնավորապես կնոջ՝ Աննա Հակոբյանի և դստեր՝ Մարիամ Փաշինյանի դեմ սկսած քարոզչական արշավը։

Ավելի ուշ ԱԱԾ-ն հերքել էր պետական հեղաշրջման նախապատրաստման մասին տեղեկությունը՝ միաժամանակ նշելով, որ Հրաչյա Հակոբյանի հայտարարությունը որպես հանցագործության մասին հաղորդում չի ընդունվել: «Հայտնում ենք, որ պետական հեղաշրջման փորձի վերաբերյալ ՀՀ ԱԱԾ-ում տեղեկություններ չեն ստացվել»,- ասվում էր Politik.am-ի հարցմանն ուղղված ԱԱԾ պատասխանում։

Այդ հերքմանը, սակայն հաջորդել էր ԱԽ քարտուղար Արմեն Գրիգորյանի հայտարարությունը, որը կրկին «Ֆակտոր»-ի եթերում, ըստ էության կրկնել էր Հրաչյա Հակոբյանի միտքը՝ նշելով, որ երկրում հեղաշրջման փորձեր իսկապես կատարվել են։ Ավելի ուշ մեկնաբանելով իր այս հայտարարությունը, նա ասել էր, թե հարցն է այդպիսին եղել եւ ինքը խոսել է այն մասին, որ «պարբերաբար ընդդիմությունը կամ նախկին իշխանությունը փորձել է տորպեդահարել և նրանք օգտագործել են և՛ գործիքներ, և՛ մարդկանց» «Մարդիկ տրվել են այդ գայթակղությանը և հետևել են այդ մտքերին ու փորձել են քայլեր ձեռնարկել։

Դրա արդյունքում, կարող եմ ասել, որ որևէ հաջողություն չեն ունեցել», - հայտարարել էր Արմեն Գրիգորյանը։ Իսկ լրագրողի դիտարկմանը, թե վերջին շրջանում եղել են ոստիկանապետի, ԱԱԾ տնօրենի, ՊՊԾ ղեկավարի պաշտոնանկությունները, կարելի՞ է ենթադրել, որ նրանք մարդիկ են, ովքեր կապված են դրա հետ կամ աչք են փակել տեղի ունեցածի վրա, Արմեն Գրիգորյանը պատասխանել էր. «Անունների հետ կապված հստակություն չեմ մտցնի։ Կարող եմ ասել, որ առաջացել են նման խնդիրներ, նաև ողջամիտ կասկածներ են առաջացել, որ այդպիսի նպատակներ կան և կանխվել են։ Դրա օգտագործման տարբեր ձևեր են եղել՝ սկսած ֆեյք ինֆորմացիայից, նաև մեր քաղաքական թիմին սևացնելը»։

Աղբյուր` Փաստինֆո