Փաստ ինֆո

ՀՀ վարչապետ Նիկոլ Փաշինյանը այսօր Կապանում ընթացող մեծ մամլո ասուլիսի ժամանակ վերահաստատել է 2016 թ-ի Ապրիլյան քառօրյա պատերազմի վերաբերյալ նախկինում հնչեցրած հայտարարությունը, թե Ապրիլյան պատերազմը տեղի է ունեցել Ռուսաստան գիտությամբ եւ թողտվությամբ։

Մասնավորապես, լրագրողը հիշեցնելով նախկինում արված հայտարարությունը, հետաքրքրվել է թե արդյո՞ք Նիկոլ Փաշինյանը հիմա էլ է այդպես մտածում։ Ի պատասխան ՀՀ վարչապետն արձագանքել է. « Ինչ որ ասել եմ 2016 թվականին, դա կա, դա մինչև հիմա էլ իմ ֆեյսբուքյան էջին կա: Ես Ձեզ ավելին ասեմ, ես մեր հանրության շրջանում առկա մի շարք մտահոգությունների մասին քննարկում եմ ունեցել նաեւ Ռուսաստանի մեր գործընկերների հետ եւ ես շատ ուրախ եմ, որ մենք շատ բարեկամական, եղբայրական, ռազմավարական դաշնակցային մթնոլորտում այդ հարցերը քննարկել ենք, խոսել ենք մանրամասն, վերլուծել ենք իրավիճակը մանրամասն և փոխադարձաբար ստացել ենք մեզ անհրաժեշտ հարցերի պատասխանները»։

Լրագրողի ճշտող հարցին, թե այնուամենայնիվ, այդպես մտածո՞ւմ է, նա արձագանքել է.«Ես Ձեր հարցին պատասխանեցի»,-եւ շեղել թեման ՝ հայտարարելով, որ ուրախ է պատասխանել լրագրողների հարցերին ու հուսով է, որ կհնչեն այն հարցերը, որոնց վարչապետը չի պատասխանել։

«Չի կարող լինել էնպիսի հարց, որի պատասխանից ես խուսափեմ»,-հայտարարել է նա։
Լրագրողը հետաքրքրվել է, թե 2016 թվականին, երբ Նիկոլ Փաշինյանը դա հայտարարում էր, փաստեր ունե՞ր, ինչին վարչապետն արձագանքել է.«Գիտեք ինչ, ես ասացի՝ այո, իմ գրառումը ծայրից ծայր, հենց նույն կերպ, առանց որեւէ սրբագրումների ես քննարկել եմ ՌԴ մեր գործընկերների հետ»։

Փաշինյանն ասել է, որ միջազգային հարաբերություններում նույն կերպ է աշխատում՝ ջանալով բոլորի հետ ունենալ մաքսիմալ պարզ գործընկերային հարաբերություններ եւ նույն սկզբունքով է առաջնորդվում թե ԵԱՏՄ , թե եվրոպացի գործընկերների հետ ու շնորհակալ է, որ դա հաճելի ու ընդունելի է։

«Ամեն ինչ քննարկել եմ, հիմա, եթե հաջորդ հարցը տաք ու ասեք ՝ դե պատմեք, թե ինքն ինչ ասաց, դուք ինչ ասացի, այդ հարցին չեմ կարող պատասխանել»,-եզրափակել է Փաշինյանը։

Աղբյուր` Փաստինֆո