Փաստ ինֆո

Վստահ եմ, որ Ազգային անվտանգության ծառայության տնօրեն Արթուր Վանեցյանն ինչ-որ փուլում անդրադառնալու է Հրայր Թովմասյանի հայտարարությանն ու մի կողմ է դնելու «սպայի պատիվը»։ Այս մասին այսօր «Փաստինֆո»-ի հետ զրույցում ասաց քաղաքագետ Արմեն Բաղդասարյանը։

Հիշեցնենք, որ Սահմանադրական դատարանի նախագահ Հրայր Թովմասյանն այսօր վաղ առավոտյան տեղի է ունեցել խուզարկություն, որից հետո նա հայտարարել է, թե լրատվամիջոցները տեսնում են այս ամբողջ գործընթացների միայն 10 տոկոսը. «ԱԱԾ նախկին տնօրենը դրա վերաբերյալ ակնարկ արեց։ Ես հուսով եմ, վստահ եմ, որ սպայի իր պատիվը թույլ չի տա, որ ինքն այդ ամբողջի մասին լռի։ Այս ամբողջ պրոցեսն ինչ է սկսվել է, ինձ հետ ինչ են խոսել, այդ ամբողջը կդառնա հանրության սեփականություն։ Եթե առ այսօր ես դրա մասին լռում եմ, դա միայն իմ երկրի հեղինակությամբ է պայմանավորված»,-ասել էր Հրայր Թովմասյանը։

Ա.Բաղդասարյանը նշեց, որ Հայաստանում ներքաղաքական իրավիճակը գնալով սրվում է և դեռ քարոզչական պատերազմների ականատես ենք լինելու։
«Այս փոքրիկ օղակների դժգոհությունները որ առկա են, որոշ դեպքերում օբյեկտիվ, որոշ դեպքերում՝ ոչ, բայց այդ ամենը քաղաքական նպատակով օգտագործողները շատանում են և այսպես երկար շարունակվել չի կարող»,-ասաց Բաղդասարյանը։

Քաղաքագետը նշեց, որ այնպիսի տպավորություն ունի, թե այս օղակներն արդեն իսկ համագործակցում են. «Համագործակցել ասելով նկատի չունեմ ինչ-որ տեղ հավաքվել ու հուշագիր են ստորագրել, բայց կարծում եմ, քանի որ ընդհանուր առմամբ նպատակը նույնն է՝ Հայաստանում իշխանափոխություն իրականացնել, ապա ինչ-որ պահի արդեն հրապարակավ կհամախմբվեն»։

Նա նշեց, որ ոչ ուղիղ ձևով, սակայն իշխանության դեմ համախմբման հայտ է եղել Միքայել Մինասյանի և Ռոբերտ Քոչարյանի կողմից։
Քաղաքագետ Աղվան Պողոսյանն էլ նշեց, որ հաշվի առնելով Արթուր Վանեցյանի նախկինում զբաղեցրած պաշտոնը, նա պետք է ասելիք ունենա ՍԴ-ի շուրջ տեղի ունեցողի և իշխանության նպատակների մասին։

«Նա պետք է ասի, թե ինչ նպատակ են հետապնդում Հրայր Թովմասյանի շուրջ տեղի ունեցող ճնշումները։ Կարծում եմ, որ ԱԱԾ նախկին տնօրենը, եթե ունի ինֆորմացիա, ապա պետք է խոսի, որովհետև ՍԴ-ն այս պահին պետականության պահպանման վերջին խրամատն է»,-ասաց Պողոսյանը։

Հարցին, Հրայր Թովմասյանի հետ կապված ինֆորմացիան կարո՞ղ է խաղաքարտ լինել Վանեցյանի համար, հաշվի առնելով իր և իշխանությունների միջև առկա լարվածությունը, նա պատասխանեց. «Եթե Արթուր Վանեցյանն ունի ինֆորմացիա, որը վտանգ է ներկայացնում մեր պետության համար, ապա նա պարտավոր է խոսել։ Եթե այսօր չխոսի, վաղն ուշ է լինելու։ Թե ինչ դիրքավորում կընտրի նա՝ ժամանակի հարց է»։

Քաղաքագետն ընդգծեց, որ առկա բոլոր հարցերին պետք է պատասխանի Արթուր Վանեցյանն ու պարզաբանի, թե ինչ էր ակնարկում Հրայր Թովմասյանը։

Հեղինակ՝ Սոնա Գեւորգյան

Աղբյուր` Փաստինֆո