Փաստ ինֆո

Գործող իշխանությունը չի կարողանում հանդուրժել իր համար ոչ կառավարելի, անկախ սահմանադրական մարմնի առկայությունը։ «Փաստինֆո»-ի հետ զրույցում նման կարծիք է հայտնել ահմանադրագետ Գոհար Մելոյանը՝ մեկնաբանելով ՀՀ ՍԴ նախագահ Հրայր Թովմասյանի տան խուզարկություն կատարելու ՀՔԾ-ի նախաձեռնությունը։

Սահմանադրագետն ընդգծեց, որ խուզարկությունը անհետաձգելի քննչական գործողություն է, որի իրականացման դատավարական կարգը հստակ նախատեսված է ՀՀ քրեական դատավարության օրենսգրքով ։

«Անգամ տարրական իրավական պատկերացումներ ունեցող ցանկացած իրավագիտակից անձ հասկանում է, որ անձին մեղադրյալ ներգրավելու օրվանից մեկ ամիս անց նրա բնակարանում իրականացվող խուղարկությունը չի կարող հետապնդել իրավաչափ նպատակ և հերթական ռեպրեսիվ ոճի կիրառումն է անձի և նրա ընտանիքի անդամների նկատմամբ»,- ասաց Մելոյանը։

Նա նկատեց, որ Հրայր Թովմասյանին առաջադրված մեղադրանքը վերաբերում է նրա՝ ՀՀ արդարադատության նախարարի՝ պաշտոնավարման ժամանակահատվածին։

«Անգամ ոչ իրավաբանի համար տրամաբանական է, որ այս մեղադրանքում խուզարկությամբ գործի շրջանակներում որևէ էական լրացուցիչ տեղեկատվություն չի կարող տրամադրել»,- ասաց սահմանադրագետն՝ ավելացնելով, որ «ՍԴ դատավորներին վաղ կենսաթոշակի ուղարկելու մասին» օրենքի ընդունումից անմիջապես հետո Հրայր Թովմասյանին առաջադրված մեղադրանքը շղթայական կապ է, որոնք ակնհայտ ռեպրեսիվ միջոցառումներ են ՍԴ նախագահի և ՍԴ մյուս դատավորների նկատմամբ՝ նրանց ստիպելու օր առաջ այդ օրենքից օգտվելու համար։
Գոհար Մելոյանի խոսքով՝ գործող իշխանությունը չի կարող հանդուրժել իր համար ոչ կառավարելի, անկախ սահմանադրական մարմնի առկայությունը և նրանք ունեն իրենց օրակարգային խնդիրը. «Կամային հատկանիշներով օժտված ՍԴ դատավորներից ազատվելու և ՍԴ-ն յուրայիններով լցնելու խնդիրն ունեն իրենց առջև դրված»,- ասաց մեր զրուցակիցը։

Ինչ վերաբերում է Հրայր Թովմասյանի հեռախոսազանգերը գաղտնալսելուն, ապա Գոհար Մելոյանը նշեց, որ ցանկացած գործողություն իրավական պետության շրջանակներում տեղավորվող տրամաբանական գործողություններ են, բայց ոչ ՍԴ-ի շուրջ ձևավորված գործընթացների շրջանակներում։
«Մեկ փաստ է ակնհայտ՝ ՍԴ-ի շուրջ գործընթացները այլևս իրավական գնահատելը ակնհայտ խեղացնում է իրավիճակը։ Քաղաքական գործընթացներ են տեղի ունենում կոնկրետ քաղաքական վերջնանպատակներով»,- ասաց Մելոյանը՝ շեշտելով, որ հատկապես զարհուրելի էր այն, որ իրավապահ մարմինները դիմել են դատարան՝ խուզարկության միջնորդությամբ և գտնվել է դատավոր, ով այդ անհեթեթ միջնորդությունը բավարարել է։

Մելոյանի խոսքով՝ հետաքրքիր կլինի հետագայում ծանոթանալ իրավական հիմնավորվածությանը, որովհետև որևէ տրամաբանության մեջ չի կարող տեղավորվել այդ գործի շրջանակներում բնակարանի խուզարկությունը և նույնը կարելի է վերագրել նաև հեռախոսազանգերի գաղտնալսումներին։

«Ցանկացած մեթոդ իրավապահները փորձում են օգտագործել որպես ճնշման միջոց»,- ասաց Մելոյանը։
Ինչ վերաբերում է պաշտպանական կողմի գործողություններին, ապա Գոհար Մելոյանն ասաց, որ կիսում է նրանց կարծիքը, որ այս գործողությունները իրավաչափության և օրինականության շրջանակում չեն կարող տեղավորվել և իրավական պետության շրջանակներում կատարվող իրավական գործողությունների հետ աղերս չեն կարող ունենալ։

Հեղինակ՝ Իզաբել Սահակյան

Աղբյուր` Փաստինֆո