Փաստ ինֆո

Պարոն Միրզոյան ես Ձեզ հորդորում եմ մնալ կոռեկտության սահմաններում և չփորձեք վիրավորել։ Ազգային ժողովում այս մասին ասաց «Լուսավոր Հայաստան» խմբակցության ղեկավար Էդմոն Մարուքյանը՝ դիմելով ԱԺ նախագահ Արարատ Միրզոյանին։

«Պարոն Միրզոյան երեք անգամ Ձեր խոսքում ասացիք, որ «լավ չեք հասկացել»։ Հորդորում եմ մնալ կոռեկտության սահմաններում և չփորձել վիրավորել և երեկվա վիրավորանքների համար, ընդդիմությանը ձիու հետ համեմատելու համար պետք է ներողություն խնդրեք։ Մենք ամեն ինչ լավ հասկացել ենք, երևի Դուք չեք գիտակցել Ձեր դերն այս խնդիրը լուծելու համար»,-ասաց Էդմոն Մարուքյանը։ Նշենք, որ վերջինս նկատի ունի Երևանի քաղաքապետարանի գործունեության վերաբերյալ «Լուսավոր Հայաստան»-ի առաջարկած քննիչ հանձնաժողովի կազմը հաստատելու վերաբերյալ ԱԺ որոշման նախագիծը, որի քվեարկությանը «Իմ քայլը» խմբակցությունը չմասնակցեց։

Էմդոն Մարուքյանը, դիմելով ԱԺ նախագահին, նշեց, որ վերջինս պետք է ապահովեր հանձնաժողովի ձևավորման գործընթացը. «Դուք երեք օր ժամանակ ունեիք փաստաթղթերն իրավական փորձաքննության ենթարկելու և նոր հայտարարելու հանձնաժողովի ստեղծման մասին։ Դուք ստուգել եք փաստաթղթերը և հայտարարել եք հանձնաժողովի ստեղծման մասին, որից հետ Երևանի ավագանու ինչ-որ իրավաբաններ ասում են՝ Դուք իրավունք չունեք։ Այսինքն պարոն Միրզոյան Ազգային ժողովն իջեցնում եք Երևանի ավագանուց ցածր մակարդակի՞։ Իրենք ե՞ն որոշում՝ ԱԺ-ն ինչ իրավունքներ ունի, ինչ իրավունքներ չունի»,-նշեց Էդմոն Մարուքյանը։

Արարատ Միրզոյանը խոստացավ, որ սա կլինի իր վերջին անդրադարձն այս հարցին. «Չգիտեմ Դուք ինչքան, ինչ նոր նյուանսներ կփորձեք սխալ լույսի ներքո ներկայացնել։ Ես կկարողանամ արձագանքել, թե ոչ, բայց կաշխատեմ այլևս չարձագանքել։ Նորից եմ ուզում հիշեցնել՝ ԱԺ կանոնակարգ սահմանադրական օրենքում նշված է, որ եթե քննիչ հանձնաժողովի նախաձեռնության տակ ստորագրած թիվը և մի քանի այլ տեխնիկական բաղադրիչ ապահովված է, ԱԺ նախագահը հայտարարում է քննիչ հանձնաժողովի ստեղծման մասին։ Այլ իրավասություն ԱԺ նախագահը չունի։ ԱԺ նախագահը չի կարող իր հայեցողությամբ որոշել՝ սահմանադրական է, թե ոչ, իրավաչափ է, թե ոչ»,-նկատեց Արարատ Միրզոյանը։

Աղբյուր` Փաստինֆո