Փաստ ինֆո

Գոհ ու շնորհակալ ենք, որ վարչապետը մինչև հունիսի 1-ը ժամանակ տվեց, սակայն գյուղացիների 90%-ը համաձայն չէ սպանդանոցների գաղափարի հետ։ Վարչապետի ելույթից հետո «Փաստինֆո»-ի հետ զրույցում ասաց Արարատի մարզի բնակիչ Աթանես Արմենակյանը։

Հիշեցնենք, որ այսօր Ազգային ժողովում ՀՀ վարչապետ Նիկոլ Փաշինյանը հայտարարել է, որ մինչեւ ս.թ. փետրվարի 6-ը կառավարությունը կդիտարկի սուբսիդավորվող վարկերի եւ լիզինգային ծրագրերում այնպիսի կարգավորումների իրականացումը, որպեսզի սպանդանոցների կառուցման եւ տրանսպորտային տեխնիկայի ձեռք բերման համար ստեղծվեն լավագույն պայմաններ։ Բացի այս, նրա խոսքով, կառավարությունը մարզպետարանների եւ ՍԱՊՏ –ի հետ կձեւավորի սպանդանոցների նախընտրելի քարտեզ եւ հասցեական կֆինանսավորվեն այն նախագծերը, որոնք կլուծեն այդ սփռվածության եւ հասանելիության խնդիրը։

«Եթե մեր սիրելի հայրենակիցների համար ընդունելի է, որ մինչեւ հուլիսի 1-ը միասին աշխատենք եւ պրոցեսը մինչեւ վերջ տանենք, պայմանով, որ թեմային հուլիսի 2-ից ի վեր այլեւս չենք վերադառնալու՝ կառավարությունը կգնա այդ ճանապարհով, եթե ոչ՝ հենց այս պահից կգործի այն կարգավորումը, որը գոյություն ունի»,-նշել էր Փաշինյանը։

«Գյուղացիները վարկեր ունեն, մարդիկ կան որ այս ընթացքում չէին կարողանում վարկերը տալ ու «մինուս են գնացել»։ Հիմա ոնց որ զոռով համաձայնեն այս տարբերակին։ Վարչապետը լավ արեց, որ ասաց՝ ով ուզում է թող բակային մորթերի հետ աշխատի, ով էլ ոչ 5-րդ ձևով։ Ում ոնց ձեռք է տալիս, թող այդպես էլ առնի, նույն միսը սուպարմարկետից կարող են գնել օրինակ 3000 դրամով, իսկ Գումի շուկայից 2700 դրամով։ Որակական ոչ մի տարբերություն»,-ասաց Արարատի մարզի բնակիչը։

Նա նշեց, որ բակային մորթի ժամանակ բոլորը տեսնում են, թե այն ինչպես է տեղի ունենում, իսկ սպանդանոցների դեպքում մորթի ընթացքը գյուղացիների համար հասանելի չէ։

«Մենք շատ սիրում ու հարգում ենք մեր վարչապետին։ Շնորհակալ ենք, որ գոնե այս 6 ամիսը տվեց, բայց թող մրցակցություն մտցներ, համեմատեր բակային մորթի միսն է շատ սպառվում, թե՞ 5-րդ ձևինը»,-ասաց նա։

Արարատի բնակիչը պատմեց, որ այսօր մի շարք շուկաներ չեն աշխատել, իսկ վարչապետի հայտարարությունից հետո բոլորը զանգել շնորհավորել են ու խնդրել են իրենից կրկին միս հանձնել։

Անդրադառնալով սպանդանոցների մաքրության հարցին` նա ասաց․ «Համար առաջին հակահիգիենիկ բանն այն է, որ այնտեղ միշտ մորթ է լինում։ Եթե մի տեղ 5 անգամ մորթ անես, 10 օր հետո անցնես այդ հատվածով, կտեսնես, որ շատ վատ հոտ է գալիս։ Այդ դեպքում ո՞նց կարող է մաքուր լինել»։

Աղբյուր` Փաստինֆո