Փաստ ինֆո

ՀՀ վարչապետ Նիկոլ Փաշինյանը կառավարության այսօրվա նիստի մեկնարկին, դիմելով կառավարության անդամներին, հանձնարարեց մինչև կառավարության փետրվարի 6-ի նիստն ուսումնասիրել սուբսիդավորվող վարկերի ծրագրերը։

«Նայում ենք, ուսումնասիրում ենք սուբսիդավորվող վարկերի մեր ծրագրերը։ Այսինքն այն ծրագրերը, որոնք այսօր էլ կարող են արտոնյալ կարգով ֆինանսավորել սպանդանոցներին և պլյուս դրան լիզինգային ծրագրերը, որի մեջ ենթադրվում է՝ պիտի տեղ լինի, եթե չկա բացենք նաև շարժական սպանդանոցների համար, որպեսզի լիզինգով դա հնարավոր լինի ձեռք բերել քաղաքացիների կողմից։ Երկրորդը կազմվում է ՀՀ-ի բաշխվածության և խտության նախընտրելի քարտեզ, և մենք հասցեական ֆինանսավորում ենք, այնպես ենք անում, որ այդ պոտենցիալ սպանդանոցներն ունենան անհրաժեշտ և խելամիտ բաշխվածություն, որպեսզի ՀՀ-ի մարզերում լինի սպանդանոցների համաչափ բաշխվածություն»,-ասաց վարչապետը։

Վերջինս նաև հավելեց, որ այս ընթացքում ընդունում են նաև առաջարկներ, թե ինչ նրբություններով կարող են հարստացնել այս փաթեթը, որպեսզի այն առավել արդյունավետ գործի։ Նիկոլ Փաշինյանն ընդգծեց՝ մինչև հուլիսի 1-ը ամենախիստ պայմաններում գործում են միայն Երևան քաղաքի սուպերմարկետները և Երևանի հանրային սննդի օբյեկտները. «Մյուս տեղերում մենք իրավիճակը թողնում ենք այնպիսին, ինչպիսին կա, դե ֆակտո այս կարգավորումից առաջ։

Պայմանով, որ հուլիսի 1-ից ամբողջ Հանրապետությունն անցնելու է այս նոր համակարգին և որևէ ցույց, բողոքի դրսևորում և այլն չի լինելու։ Եթե այս պայմանն այսօր բողոքի գործողություններ իրականացնող մեր սիրելի հայրենակիցների համար ընդունելի է կամ համաձայն են, որ պայմանավորվենք սրա շուրջ, ուրեմն այս որոշումը կկայացնենք մինչև հուլիսի 1-ը։ Սա պետք է լինի մեր պայմանավորվածությունը, եթե պարզվի ընդունելի չէ, ուրեմն մենք այդ վարկային ծրագրերը բացելով պետք է ասենք, որ այսօրվանից է այդ պայմանը գործում։ Այսինքն եթե հուլիսի 1-ից ընդունելի չէ, ուրեմն թող այսօրվանից ընդունելի չլինի»,-նշեց վարչապետը։

Աղբյուր` Փաստինֆո