Փաստ ինֆո

Իշխանական ողջ համակարգում կարծես ռոմանտիկներ չկան՝ Փաշինյանի հետ քաղաքացիական պայմանագիր կնքածներ են՝ ծառայություն՝ ծառայության դիմաց տարբերակով կամ՝ քայլածներ՝ հանուն պաշտոնի, բայց եկեք-տեսեք՝ այս հույժ նյութապաշտ անձինք Դոն Կիխոտ Լամանչեցու հանգույն, հողմաղացների դեմ են պայքարի ելել:

Հայտնաբերել ենք, վնասազերծել ենք, կանխել ենք՝ հայտարարում է այսօր ԱԱԽ քարտուղարը՝ անդրադառնալով ընդդիմությանը և հայտարարելով, թե՝ «նախկին իշխանությունը պարբերաբար փորձել է տորպեդահարել իշխանությանը»։

Ի՞նչ, որտե՞ղ, ե՞րբ հարցին, բնականաբար ԱԱԽ քարտուղարը հստակ պատասխան չունի, ինչպես ժողովուրդը կասեր՝ խոսքը կտուրն է գցում:

Լավ, ախր՝ ինչպե՞ս:

Եվ կինոյի տղան հերոսաբար հայտարարում է՝ «Նրանք օգտագործել են և՛ գործիքներ, և՛ մարդկանց։ Շատ մարդիկ տրվել են այդ գայթակղությանը և տրվել են այդ մտքերին կամ գաղափարներին ու փորձել քայլեր ձեռնարկել։ Դրա արդյունքում կարող եմ ասել, որ որևիցե հաջողություն չեն ունեցել»:

Խոսում է, բառեր է իրար հետևից շարում՝ անպատասխան թողնելով լրագրողի հարցը՝ ովքե՞ր, ու՞մ նկատի ունի ԱԱԽ քարտուղարը, նրանք՝ ովքե՞ր են…

«Տարբեր մարդիկ»,- հնչում է քպական հերոսի բազմանշանակալից պատասխանը:

Դե, դուք լարեք ձեր երևակայությունը, էլ ովքեր պիտի լինեն՝ սևերը, հակահեղափոխականները, ընդդիմադիրները…

Հիշենք Դոն Կիխոտին՝ «Պանդոկը նրան թվում է դղյակ, հողմաղացները՝ հսկա հրեշներ, ոչխարի հոտը՝ հակառակորդի զորք, թեթևաբարո կանայք՝ ազնվազարմ օրիորդներ»…

Լավ, բա հո այդպես անպատիժ չեն մնալու այդ սևերը, ի՞Նչ պիտի անել, ի՞նչ իրավական հետևանքներ կունենա նրանց այդ արարքները՝ միմյանց հերթ չտալով հարցնում են լրագրողները:

Պատասխանը ավելի քան խորիմաստ է՝ ինչ-որ մտքեր, գաղափարներ ունենալը դժվար կլինի դատապարտել. «Գործողություններն էլ այնպիսին են, որ երբեմն դրանք մարդկանց նպատակների և երազանքների հետ կապելը դժվարություններ է առաջացնում։ Բայց կարող եմ ասել՝ դա կանխվել է և այս պահին վտանգ չկա»:

Օ՜, Փառք Տիրոջը, ամեն ինչ հետևում է մնացել, լավ, իսկ այդ տիտանական աշխատանքի հետևանք որպես պաշտոնանկություններ չե՞ն եղել: Դե իհարկե, եղել են, միայն թե ԱԱԽ քարտուղարն անուններ չի նշի, քանի որ, ըստ նրա՝ անունները որևէ հստակություն այս պահին չեն մտցնի:

Բավական է՝ ասել, որ «ողջամիտ կասկածներ են առաջացել, որ այդպիսի նպատակներ կան և դրանք կանխվել են»։

Դե իհարկե, բավական է, ի վերջո՝ ավելի տեսանելի և շոշոփելի բան մեր իրականության մեջ կա՞ քան՝ ինչ-որ անանուն մարդկանց՝ երազների և նպատակների վերաբերյալ ողջամիտ կասկածները:

Իսկ այդ կասկածները, պարզվում է՝ շատ տարբեր դրսևորումներ են ունեցել՝«սկսած ֆեյք ինֆորմացիայից մինչև տարբեր տեսակի միջոցներով քաղաքական թիմին սևացնելու փորձերը։

Բայց իշխանությունը այս ամենը հերոսաբար հաղթահարել է: Ինչպես հաղթահարեց այսօր՝ հաշված ժամերի ընթացքում , հենց ոստիկանությունը տեղեկացավ, որ Էրեբունի Պլազա բիզնես կենտրոնում զինված անձ կա, կրակոցներ են հնչում, ոստիկանությունը միանգամից օպերատիվ խումբ ուղարկեց, տեղում գործողություն իրականացրեց, կատարվեցին անհետաձգելի աշխատանքներ, ընթացան բանակցություններ։ Ի վերջո, այս ամենի արդյունքում՝ զինված անձը վայր դրեց զենքը։

Բա ո՞նց վարչապետը էսքանից հետո ի լուր աշխարհի չգրի՞ իր ֆեյսբուքյան էջում՝ «Բռնության որեւէ դրսեւորում, որեւէ պատճառով կամ հիմնավորմամբ՝ անընդունելի է: Ո՛չ բռնությանը: Հայաստանն առանց բռնության»: Մանավանդ, սորոսյան թրանսփարանսին հիմնավորապես՝ 28 + նիշով ծանուցում է՝ Հայաստանը Ժողովրդավարության կղզյակ է: Սա է արդյունքը:

Ոչ թե՝ այն, ինչ գրում, գրում, գրում՝ ահազանգում եք ԶԼՄ-ներում, սոցցանցերում, միտինգներում, թե՝ ճնշում կա ՝ ՍԴ նախագահի, դատավորների դեմ, մամուլի դեմ, հետուստաընկերությունների դեմ, ՀՀ նախագահների դեմ, փաստաբանների դեմ, և այլն, և այլն: Այդ բոլորը ձեր աչքին է երևացել…

Ա.Ե.

Աղբյուր` Փաստինֆո