Փաստ ինֆո

ԱԱԾ նախկին պետ Արթուր Վանեցյանի փաստաբան Լուսինե Սահակյանը վստահեցնում է, որ Արթուր Վանեցյանի մասին «Հայկական ժամանակ»-ի հրապարակման մեջ տեղ գտած տեղեկատվությունն ակնհայտ հերյուրանք են և ակնհայտ ստահոդ։ Այս մասին «Փաստինֆո»-ի հետ զրույցում ասաց փաստաբան Լուսինե Սահակյանը։

«Ակնհայտ է, որ դա արվել է հատուկ նպատակով, ուստի՝ այդ հերքման տեքստն ուղարկել ենք այդ լրատվամիջոցին և մենք փորձում ենք հույս ունենալ, որ խելամիտ կգտնվեն և հենց լրատվամիջոցն ինքը հերքում կտպագրի և գործը չի հասնի դատարան»,- ասաց Լուսինե Սահակյանը։

Ինչպես արդեն տեղեկացրել ենք՝ ԱԱԾ նախկին տնօրեն Արթուր Վանեցյանի ներկայացուցիչները դիմել են «Հայկական Ժամանակ» կայքում հրապարակված «Պատիվ ունե՞մ, թե՞ պատիվ չունեմ...» վերտառությամբ նյութում տեղ գտած տեղեկատվությունը հերքելու պահանջով։ Լուսինե Սահակյանն ընդգծեց, որ անկախ նրանից՝ հրապարակումն անանուն է, թե ոչ, պատասխանատուն լրատվամիջոցն է, այսինքն՝ լրատվամիջոցը պարտավոր է հերքում տպագրել։

Փաստաբանի խոսքով՝ հերքում չտպագրելու դեպքում դիմելու են դատարան և այդ դեպքում լրատվամիջոցը պետք է հիմնավորի, որ այդ տեղեկատվությունը համապատասխանում է իրականությանը։

«Մենք նշել ենք, որ դա զրպարտություն է ակնհայտ և այդ նյութում տեղ գտած գրեթե բոլոր արտահայտությունները, տեղեկությունները, եթե դրանք տեղեկություններ են, ակնհայտ զրպարտչական են, ստահոդ են և լրատվամիջոցն օրենսդրությամբ սահմանված կարգով պետք է հիմնավորի, որ դա համապատասխանում է իրականությանը »,- ասաց Սահակյանը՝ շեշտելով, որ լրատվամիջոցը չի կարող դա հիմնավորել։

Հարցին, թե արդյո՞ք ավելի հեշտ չէր լինի միանգամից դատարան դիմելը, Լուսինե Սահակյանը պատասխանեց, որ հույս ունեն, որ խելամտությունը կհաղթի և լրատվամիջոցն ինքը դա կհերքի։

Բացի այդ՝ «Զանգվածային լրատվության միջոցների մասին» ՀՀ օրենքի պահանջների համաձայն՝ պետք է դիմել լրատվամիջոցին և համապատասխան ժամկետի սահմաններում հերքումը չհրապարակելու դեպքում նոր միայն դիմել դատարան։

Հեղինակ՝ Իզաբել Սահակյան

Աղբյուր` Փաստինֆո