Փաստ ինֆո

Ես ուղղակի ապշած եմ, որ երկրի երկրորդ պաշտոնյան կարող է իր խոսքի արժեքի վերաբերյալ այդքան անլուրջ մոտեցում ունենալ։ «Լուսավոր Հայաստան» խմբակցության հրավիրած մամուլի ասուլիսի ժամանակ այս մասին ասաց խմբակցության ղեկավար Էդմոն Մարուքյանը։ Վերջինս նկատի ուներ ԱԺ նախագահ Արարատ Միրզոյանին, ով դեկտեմբերի 5-ին հայտարարել է, որ ստեղծվել է քննիչ հանձնաժողով, սակայն այսօր փաստացի հանձնաժողովի կազմը հաստատելու մասին նախագիծը չընդունվեց։

«Ըստ ԱԺ կանոնակարգ սահմանադրական օրենքի՝ ստորագրությունները հավաքվեցին, մուտքագրվեցին ԱԺ, ԱԺ նախագահը, եթե եռօրյա ժամկետում այն չի ներկայացվում նախաձեռնողներին և չի ասում, որ խնդիր կա դրա հետ կապված, այդ թվում իրավասությունների հետ կապված, ապա պետք է հայտարարի, որ հանձնաժողովը ստեղծված է։ Դեկտեմբերի 5-ին ԱԺ նախագահ Արարատ Միրզոյանը հայտարարում է՝ տպավորություն չլինի, որ ԱԺ-ն պետք է գործի իր լիազորություններից դուրս, այնուամենայնիվ քննիչ հանձնաժողովը պետք է համարել ստեղծված, քանի որ կա քաղաքական կամք»,-նշեց Էդմոն Մարուքյանը։

Պատգամավորը նկատեց՝ ԱԺ նախագահի դիրքի հարցն է այստեղ, այսինքն այդ դիրքը կա՞, թե՞ չկա։

Էդմոն Մարուքյանը նշեց՝ քննիչ հանձնաժողովի կազմը հաստատելու փոխարեն իշխանական խմբակցությունից պատգամավորներ են ելույթ ունենում և ասում, որ դա լիազորությունների իրավազանցում է. «Սա խոսում է այն մասին, որ առաջինը նրանք պատրաստվել էին, որ փորձեն իրենց ելույթներով խեղաթյուրել պրոցեսը, որ այսօրվա քվեարկությունը համընկնի։ Հետո իշխանական խմբակցության ղեկավարը ելույթ է ունենում ու ասում, որ «Իմ քայլը» որոշել է դեմ քվեարկել, իսկ այսօր չեն քվեարկում՝ տապալելով հանձնաժողովի ձևավորումը։ Այսինքն` կա ստեղծված հանձնաժողով, բայց չունի անդամներ, որովհետև անդամների թվի մասին որոշում չկա։ Եթե հանձնաժողովը ստեղծվեր, իշխանությունն ունենալու էր 7 անդամ, ԼՀԿ-ն և ԲՀԿ-ն միասին ունենալու էին 4 անդամ։ Պատկերացնու՞մ եք՝ մարդիկ վախենում են ստեղծել մի հանձնաժողով, որտեղ իրենք մեծամասնություն են։ Նման հանձնաժողով ստեղծելուց իշխանությունը վախենում է, որովհետև կան կոռուպցիոն գործարքների վերաբերյալ կասկածներ և դրանք փոխանակ փարատեն, իրենք այդ կասկածներն արմատավորում են»,-ընդգծեց Էդմոն Մարուքյանը։

Աղբյուր` Փաստինֆո