Փաստ ինֆո

Առանձնապես շատ սուրճ չեմ խմում, բայց օրինակ մեկ շաբաթ առաջ Էդմոն Մարուքյանի հետ սուշի էինք ուտում։ Լրագրողների հետ զրույցում այս մասին ասաց «Իմ քայլը» խմբակցության պատգամավոր Ռուբեն Ռուբինյանը։

«Բարոյականությունն ինձ թույլ չի տալիս մանրամասնել, թե ինչ թեմաներով էր ինձ հետ խոսում պարոն Մարուքյանը և ինչ հարցերով էր խորհուրդ հարցնում»,-ասաց Ռուբեն Ռուբինյանը։

Անդրադառնալով «Լուսավոր Հայաստան» խմբակցության ղեկավար Էդմոն Մարուքյանի հայտարարությանն այն մասին, որ իշխանության անդամներն էյֆորիայից գլուխները կորցրել են, Ռուբեն Ռուբինյանը նկատեց՝ «Իմ քայլը» խմբակցությունը հայտարարում և հիմնավորում է, որ քննիչ հանձնաժողով ստեղծելը հակասահմանադրական է լինելու և խնդիր է ստեղծելու, որովհետև Երևանի ավագանու գործառույթների մեջ են խառնվելու և հետևաբար չի մասնակցում քվեարկությանը. «Դրան ի պատասխան պարոն Մարուքյանն ասում է՝ դուք ուզում եք կոծկել կոռուպցիան։ Մենք էլ ասում ենք սիրելի պարոն Մարուքյան, սիրելի Էդմոն մենք չենք ուզում կոծկել կոռուպցիան, մենք կողմ ենք, որպեսզի հարցը քննարկվի Երևանի ավագանիում, կողմ ենք, եթե օրինակ այնտեղ ստեղծեք հանձնաժողով»,-նշեց պատգամավորը։

Ռուբեն Ռուբինյանի խոսքով մարդը, որը ցանկություն կունենար բովանդակային քննարկում ծավալելու, բովանդակային փաստարկներ կբերեր, փոխարենը պատգամավորի խոսքով Էդմոն Մարուքյանը սկսեց կրկին հայտարարել, որ իշխանությունը ճնշում է։

Ռուբեն Ռուբինյանը ընդդիմադիր գործընկերներին և Էդմոն Մարուքյանին կոչ արեց՝ պետք չէ իր հետ սուրճ խմել, պարզապես պետք է կոռեկտ լինեն։

Աղբյուր` Փաստինֆո