Փաստ ինֆո

Այնքան չեք աշխատել նախագծի վրա, որ իմ գործընկեր Միքայել Մելքումյանը ստիպված հաշվարկ է անում, թվաբանություն է անում։ Ազգային ժողովում «Պետական կենսաթոշակի մասին» օրենքում փոփոխություն անելու վերաբերյալ նախագծի քննարկման ժամանակ ասաց «Բարգավաճ Հայաստան» խմբակցության պատգամավոր Սերգեյ Բագրատյանը։ Նշենք, որ նախագծով առաջարկվում է բարձրացնել կերակրողին կորցրած ուսանողի կենսաթոշակ ստանալու տարիքը։ 

«Նախագիծը թվերով են ներկայացնում ժողովուրդ ջան։ Սա հայոց լեզվի և գրականության շարադրություն չի։ Օրենքի նախագիծը պետք է ունենա հստակ թվեր, կանխատեսվածություն»,-նշեց Սերգեյ Բագրատյանը՝ հարցնելով՝ բյուջեի ավելցուկ, պրոֆիցիտ ունենք և որոշել ենք՝ «շաբաշներ» ենք տալիս։

«Ծննդատուն է փակվում տասնյակ մլն դրամներ չունենալու պատճառով։ Եթե սա 360 մլն է, իմ գործընկերոջ հաշվարկն եմ անում, որովհետև այլ հաշվարկ չունեմ, կարող ենք այդ ծննդատներն աշխատեցնել։ 26 տարեկան լուրջ տղամարդուն պետք չէ համարել երկկողմանի ծնողազուրկ։ 26 տարեկան տղաները լուրջ մարդիկ են, ընտանիք ունեն։ Եթե սովորելու հետ եք կապում, ես ասենք, որ Կառավարման ակադեմիայում սովորում էի, 63 տարեկան մարդ կար մեր հետ, միգուցե նրա թոշակի մասին է՞լ դուք մտածեք։ Անպայման ծնողազուրկ կլինի»,-ասաց պատգամավորը՝ ընդգծելով, որ չպետք է գնալ մի ճանապարհով, որը հաշվարկ չունի։

Սերգեյ Բագրատյանը «Իմ քայլը» խմբակցության իր գործընկերներին հորդորեց նախագիծը հետ տանել, նորմալ մշակել, այնուհետև դիմելով Աշխատանքի և սոցիալական հարցերի փոխնախարար Սմբատ Սաիյանին՝ ասաց. «Պարոն Սաիյան նորմալ թվերով ներկայացեք Ազգային ժողով։ Չի կարելի սենց վերաբերմունք ունենալ»,-հավելեց Սերգեյ Բագրատյանը։

Աղբյուր` Փաստինֆո