Փաստ ինֆո

Գեորգի Կուտոյանի մահվան հետ կապված հիմնական վարկածը, որն այսօր քննվում է ինքնասպանության հասցնելն է։ Այս մասին այսօր Ազգային ժողովում հայտարարեց ՀՀ վարչապետ Նիկոլ Փաշինյանը՝ նշելով, որ դեպքի հանգամանքներն ամբողջությամբ պարզելու հարցում ամենից շատ շահագրգիռ պետք է լինեն նրա ընտանիքի անդամները

«Ես էլի ասել եմ ու ասում եմ, որ երաշխավորում եմ՝ Կառավարությունն իր բոլոր լծակներից կօգտվի, որպեսզի այս գործն ու բոլոր մնացած գործերը մինչև ամենավերջին դետալը բացահայտվեն։ Բայց ես ուզում եմ ձեր ուշադրությունը հրավիրել այն փաստի վրա, որ նախորդ իշխանության որոշ ներկայացուցիչներ աղմուկ են բարձրացրել, թե Կառավարությունը պատշաճ վերաբերմունք չի ցուցաբերել Կուտոյանի մահվան կապակցությամբ»,-ասաց վարչապետը։

Փաշինյանն ընդգծեց, որ վարչապետին ենթակա Ազգային անվտանգության ծառայության պատվո պահակախումբն իր ներկայությամբ պատվել է Կուտոյանի հոգեհանգիստը, իսկ ԱԱԾ տնօրենի ժամանակավոր պաշտոնակատարն ու ողջ ղեկավար կազմը մասնակցել է հոգեհանգիստին ու հուղարկավորության արարողությանը։

«Մասնակցել է նաև անվտանգության խորհրդի քարտուղարը, որպես Կառավարության, վարչապետի ներկայացուցիչ։ Ես լրատվամիջոցի հարցին ի պատասխան ցավակցություն եմ հայտնել Կուտոյանի սգակիր ընտանիքին։ Իսկ ի՞նչ պետք է աներ ուրիշ Կառավարությունը։ Իսկ ինչու՞ այդ նույն մարդիկ նույն հարցը չէին բարձրացնում, երբ Հայկ Հարությունյանի հետ կապված էր դեպք տեղի ունեցել, այսինքն` նրանք վերաբերմունքի տարբերություններ ունե՞ն։ Նրանք նախկին պաշտոնյաներ են եղել, ընդ որում պաշտոնավարել են առնվազն վիճահարույց շրջաններում և մենք պատշաճ ձևով ամեն բան արել ենք։ Ինչ պետք է արվեր, արվել է»,-ասաց վարչապետը։

Աղբյուր` Փաստինֆո