Փաստ ինֆո

Հակահեղափոխականներ-հեղափոխականներ, սևեր-սպիտակներ՝ այս հակադրությունները մեր իրականություն ներմուծողը ներկա իշխանությունները եղան, այսինքն՝ հեղափոխությունից անմիջապես հետո ի սկզբանե՝ վերին մակարդակով խնդիր դրվեց՝ բաժանարար գծեր գծելու՝ նախկինները՝ քըխ են, ներկաները՝ պուպուշ են:

Այս մտայնության առաջին բարձրաձայնողը Երևանի քաղաքապետն էր՝ իր հայտնի սևեր-սպիտակներ բաժանմամբ, իսկ այն խորացնողը՝ պետական կառավարման համակարգ գործուղված քպականները: Հետո, բնականաբար, այդ ամենը տեղափոխվեց մամուլ, սոցիալական ցանցեր: Հաճախ կարելի է լսել, թե իշխանության այս կամ այն ներկայացուցիչը ֆեյք էջեր ունի, որոնցով հայհոյախառն արտահայտություններ է անում՝ ուղղված նախկիններին, կամ՝ հակառակը: Ֆեյք թե իրական, ցանկացած էջի հետևում մարդ է կանգնած, այլ ոչ՝ ռոբոտ, ինչը նշանակում է՝ մի կողմից ՝ իրական կյանքում, մյուս կողմից՝ ֆեյք+ֆեյք+դրանց կառավարողները վիրտուալ տիրույթում ապականում են մթնոլորտը՝ ավելի ու ավելի խորացնելով հասարակության մեջ առկա առճակատումները:

Ահա այսպես ստացվեց, որ թավշյա լիդերը սեր քարոզելով եկավ, սակայն ցանեց ատելություն և թշնամանք:

Եվ հարգանքի, սիրո, խղճմտանքի, բարության փոխարեն այսօր ունենք անսիրտ ու անհոգի, մեկմեկու սահմանային-սթրեսային վիճակի հասցնող ՖԲ տիրույթ ու հանրություն: Այնպիսին, որի անդամներն անտեսելով զավակ ու ամուսին կորցրած Կուտոյանների ընտանիքի անպարագիծ կորուստն ու վիշտը՝ իրենց տափակ շաղակրատանքով կամ չարախնդոցով շարունակ բորբոքում են այն:

ՈՒնենք Հանրային խորհուրդ, որի նորանշանակ նախագահը արդեն իսկ առկա թշնամանքը, սուր անկյունները հարթելու փոխարեն՝ ամեն օր հին ոխի վրա թույնի նոր դոզա է ավելացնում:

ՈՒ այս ամենին էլ գումարած, արդեն երեկ պարզվեց՝ ունենք Ազգային Ժողով, որի պատգամավորները միմյանց վախեցնում են այս կամ այն կարկառուն հանրապետականի հետ սուրճ խմած լինելու հանգամանքով: Այսինքն, ստացվում է, որ Ազգային Ժողովը մականունավորներից ձերբազատվելու ճանապարհին ոչ թե շահեց, այլև կորցրեց: ՈՒ հիմա խորհրդանային մեծամասնության ներկայացուցիչը փոքրամասնության ներկայացուցչին մեղադրում է… Արմեն Աշոտյանի հետ սուրճ խմելու համար: Վերջինս էլ հիշեցնում է քպականին, թե վերջին սուրճ խմողը հենց ինքն է եղել՝ այսինչ վայրում: Չէ, դուք հասկանու՞մ եք, թե այս կերպ մենք ուր կհասնենք, այսպես պետություն, պետական շահ՝ ամեն բան փոշիացնելու տրամաբանությունն է գործում: Այո, Աշոտյանը քաղաքական գործիչ է, որը նախորդ շրջանում ամբարած խորհրդարանականի իր կապիտալը ի սկզբանե պատրաստակամություն հայտնել է հանուն Հայաստանի ծառայեցնելու վերաբերյալ: Հիշենք, թեկուզ վարչապետի՝ Վրաստան կատարած առաջին այցին նրա մասնակցությունը:

Ընդ որում, հասարակության մեջ նախկինների մարգինալացման, մարդկանց իրենց ոլորտներից օտարելու քաղաքականությունը նոր չի , ուղղակի այն արդեն նաև Ազգային Ժողովի մակարդակով է բարձրաձայնվում: Սա ցավալի փաստ է, որը եթե չկասեցվի, հետևանքները կրելու են ոչ միայն անհատներն ու քաղաքական ուժերը, այլև՝ պետությունը:

Պետություն և ժողովուրդ կառավարելը հմտություն է, որի հաջողությունը պայմանավորված է հրապարակում առկա ուժերին համախմբող, միավորող ընդհանրություններով, այլ ոչ թե՝ տարբերություններով:

Ի վերջո, ցանկացած իշխանություն մի օր դառնում է ընդդիմություն և հակառակը, իսկ կաթսայի կափարիչը փակելը միշտ ավելի է արագացնում իշխանության մայրամուտն ու վախճանը: Երեկ Աշոտյանին ավելի շուտ փիար արեցին, քան՝ հակառակը: Քանի որ հաստատեցին երկուստեք, որ նրանից սովորելու բան ունեն և որ նրա հետ սուրճ խմելը հաճելի է, քանի որ հետաքրքիր զրուզակից է:

Ազատ եղեք ձեր հանդիպումների մեջ, իսկ սուրճ խմեք մտերիմների, հաճելի ու լայնախոհ մարդկանց հետ:

Հեղինակ՝ Ա.Ե.

Աղբյուր` Փաստինֆո