Փաստ ինֆո

ՀՀ ազգային անվտանգության ծառայության նախկին տնօրեն Գեորգի Կուտոյանի ատրճանակի՝ Glock 34-ի վրա դեպքի օրը՝ հունվարի 17-ին խլացուցիչ չի հայտնաբերվել։ Այս մասին «Փաստինֆո»-ին հայտնեց ՔԿ դեպարտամենտի տեղեկատվության և հասարակայնության հետ կապերի բաժնի պետի պաշտոնակատար Նաիրա Հարությունյանը։ 

Հիշեցնենք, որ հունվարի 17-ին Երևանի Պարույր Սևակի փողոցի բազմաբնակարան շենքերից մեկում` իր բնակարանում, հյուրասենյակի բազմոցի վրա հայտնաբերվել է Գեորգի Կուտոյանի դին` հրազենային վնասվածքով:

Դեպքի առթիվ հարուցվել է քրեական գործ ՀՀ քրեական օրենսգրքի 110-րդ հոդվածի 1-ին մասով՝ ինքնասպանության հասցնելու հատկանիշներով։

Պաշտոնական հաղորդագրության համաձայն՝ բազմոցի դիմաց առկա փոքր սեղանի վրա հայտնաբերվել է 35 հատ կրակված պարկուճ և 6 հատ գնդակ, հյուրասենյակի հատակին հայտնաբերվել է 7 հատ պարկուճ, 1 հատ գնդակ, իսկ հյուրասենյակի հարևանությամբ գտնվող խոհանոցի հատակին հայտնաբերվել է ևս 3 գնդակ: Իսկ Կուտոյանի աջ ոտքի մոտ՝ հատակին, հայտնաբերվել է Glock տեսակի ատրճանակ առանց փամփուշտի:

Ըստ նախաքննական մարմնի վարկածի՝ դեպքի օրը Գ.Կուտոյանն ինքնասպանություն է գործել, իսկ մինչ այդ՝ 2019 թվականի դեկտեմբերի վերջերին կրակել իր տան պատերին։

«Քննությամբ ձեռք բերված տվյալների համաձայն՝ 2019 թվականի դեկտեմբերի 9-ին, Գ. Կուտոյանը ՀՀ վերադառնալուց հետո, ժամանակավորապես բնակվել է հայրական տանը, սակայն ժամանակ առ ժամանակ այցելել է Պարույր Սևակի փողոցում գտնվող իրեն պատկանող բնակարան:

Միաժամանակ տվյալներ են ստացվել այն մասին, որ 2019 թվականի դեկտեմբերի վերջերին Գ. Կուտոյանը միայնակ այցելել է նշված բնակարան, որտեղ, ալկոհոլ օգտագործելուց հետո, օրինական կարգով իրեն պատկանող Glock 34 տեսակի ատրճանակից 35 անկանոն կրակոց է արձակել հյուրասենյակի և խոհանոցի բաժանարար պատին»,-հայտնել է քննչական կոմիտեն։

Իսկ, թե ինչպես հարեւանները չեն լսել այդ կրակոցների ձայները՝ պարզ չէ։ Ն.Հարությունյանը «Փաստինֆո»-ին հայտնեց, որ այս պահին նախաքննության մարմինը տվյալներ չունի, թե արդյոք դեկտեմբեր ամսին Կուտոյանի կողմից գործածված զենքի վրա խլացուցիչ եղել է, թե ոչ։

Հեղինակ՝ Իզաբել Սահակյան

Աղբյուր` Փաստինֆո