Փաստ ինֆո

«Մենք սովորել ենք, որ կաթը պետք է կթենք ձեռքով, ալյումինե դույլերով, ռեզինի սապոգներով եւ այդ կաթի մեջ, հազար ներողություն, պետք է անպայման գոմաղբի որոշակի արտադրություն լինի»,-ԱԺ-կառավարություն հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը՝ անդրադառնալով տեղական կաթի որակին։

Նա ասաց, որ Հայաստանում արտադրվող կաթը չի համապատասխանում այն չափանիշներին, որոնք համապատասխանում են բարձրորակ արտադրանքը ստանալու համար։ Փաշինյանը նշեց, որ Հայաստանում գործում է հոլանդական պանիր արտադրող ընկերություն, որը ներմուծված կաթի փոշով է աշխատում, որովհետեւ տեղական կաթի որակը չի համապաստասխանում ստանդարտներին։

Պատգամավորներից մեկը բարձրացրեց բնական կաթով մթերք արտադրողների խնդիրը, որոնց արտադրանքը պակաս մրցունակ է ներմուծված կաթի փոշով աշխատող ընկերությունների արտադրանքի համեմատ։

«Եթե ուզում ենք բարձրակարգ արտադրություն, պետք է մեր նշաձողերը բարձրացնենք»,-հայտարարեց Փաշինյանը։ Նա ասաց, որ անցած տարի հայտարարել է խելացի անասնագոմերի ծրագրի մասին, որով աջակցում են գյուղացիներին, զրո տոկոսով վարկ են տալիս, ուսուցանում են, որպեսզի ստեղծեն այդ անասնագոմերը։

«Ես դեմ եմ, որ մենք ամեն անգամ սկսենք լացել, ասենք՝ վաաայ»,-բացականչեց վարչապետը։

Վարչապետն ասաց, որ մի կողմից չենք կարող տնտեսվարողներին արգելել ունենալ սոյայի կա այլ բուսական յուղով արտադրված թթվասեր, մյուս կողմից, պետք է պարզ լինի, թթվասերի բաղադրությունը։ Փաշինյանն ասաց, որ հանձնարարություն է տվել, թթվասերի գույները տարբերակել ըստ գույների, օրինակ, ամբողջությամբ կաթնամթերքից արտադրված թթվասերի տուփը պետք է լինի սպիտակ։

Փաշինյանն ասաց, որ պրոբլեմն այն է, որ մեզ համար գյուղացին պետք է լինի ճաքած ձեռքերով, տանջված, ցնցոտիներով . «Ոչ, մենք ասում ենք՝ պետք է այդ ստանդարտներից դուրս գանք։ Կներեք, թրիքոտ կաթով հնարավոր չէ բարեկեցություն ստանալ, չի կարելի պահանջել, որ մթերողները գան, թրիքոտ կաթը մթերեն։ Բայց մենք մենակ չենք քննադատում, մենք ասում ենք՝ փողը տալիս ենք, կովը տալիս ենք, կերը տալիս ենք, խոտը տալիս ենք, անասնապահին տալիս ենք, եկեք իրար հետ աշխատենք, ստանդարտը բարձրացնենք, էլ ի՞նչ անենք»,-հայտարարեց վարչապետ Փաշինյանը։

Աղբյուր` Փաստինֆո