Փաստ ինֆո

Ազգային ժողովը 73 կողմ, 20 դեմ և 15 ձեռնպահ ձայների հարաբերակցությամբ երկրորդ ընթերցմամբ և ամբողջությամբ ընդունեց քրեական ենթամշակույթին վերաբերող նախագիծը։

«Լուսավոր Հայաստան» խմբակցության պատգամավոր Տարոն Սիմոնյանը նախապես հայտնեց՝ խմբակցությունը ձեռնպահ է քվեարկելու. «Մենք շարունակում ենք մնալ այն դիրքորոշմանը, որ ներկայացված իրավակարգավորումներն իրավական անորոշությամբ են պատված և իրավակաիրառ պրակտիկայում կտեսնենք, որ խնդիրներ առաջանալու է և կառավարությունը կրկին վերադառնալու է այս ամբիոն և խնդրի՝ փոփոխել այդ օրենսդրական դրույթները այն տարբերակով, որ մենք ենք առաջարկել։ Ձեռնպահ ենք քվեարկելու»,-ասաց պատգամավորը։

Նշենք, որ «ՀՀ քրեական օրենսգրքում» փոփոխություններ և լրացումներ կատարելու մասին և «ՀՀ քրեական դատավարության օրենսգրքում» լրացում կատարելու մասին օրենքի նախագծերի փաթեթով քրեական պատասխանատվություն է առաջարկվում քրեական աստիճանակարգության բարձրագույն կարգավիճակ տալու, ստանալու կամ պահպանելու համար, քրեական ենթամշակույթ կրող խմբավորում ստեղծելու կամ ղեկավարելու համար, քրեական ենթամշակույթ կրող խմբավորմանը մասնակցելու կամ ներգրավվելու համար և քրեական ենթամշակույթ կրող խմբավորման մասնակցին կամ քրեական աստիճանակարգության բարձրագույն կարգավիճակ ունեցող անձին դիմելու համար։

Հեղինակ՝ Հասմիկ Կոշկարյան

Աղբյուր` Փաստինֆո