Փաստ ինֆո

Դատավոր Դավիթ Գրիգորյանի նկատմամբ քրեական հետապնդումը դադարեցնելու մասին որոշումը դեռևս չի կայացվել։ «Փաստինֆո»-ի հարցմանն ի պատասխան ՀՔԾ-ից հայտնեցին, որ գործի նախաքննությունը շարունակվում է։

Ավելի վաղ տեղեկացրել ենք, որ վերաքննիչ քրեական դատարանը, քննելով դատավորի աշխատասենյակում խուզարկություն կատարելու թույլտվության մասին դատարանի որոշման դեմ պաշտպանական կողմի վերաքննիչ բողոքը, արձանագրել է, որ Դավիթ Գրիգորյանի նկատմամբ քրեական գործ հարուցելու մասին որոշումը ոչ իրավաչափ և անօրինական է, քանի որ տվյալ որոշմամբ փաստացի արդեն իրականացվել է դատավորի նկատմամբ քրեական հետապնդում՝ առանց Բարձրագույն դատական խորհրդի համաձայնության։

Պարզվում է՝ ՀՀ գլխավոր դատախազի կողմից քրեական գործը հարուցելու մասին որոշման մեջ ձևակերպումներում մատնանշվում է կոնկրետ անուն՝ Դավիթ Գրիգորյանի կողմից պաշտոնեական կեղծիք կատարելու առերևույթ դեպքի առկայության մասին, ինչն ինքնին փաստում էր, որ Դավիթ Գրիգորյանը կասկածվում էր քննարկվող հանցագործության մեջ և որպես պաշտոնական հայտարարություն դա հնարավորություն էր տալիս դատավորին ձեռք բերել կասկածյալի կարգավիճակ, մինչդեռ օրենսդիրը սահմանում է, որ Գլխավոր դատախազը պետք է դիմեր ԲԴԽ և ստանալ համաձայնությունը, ապա նոր սկսեր քրեական հետապնդում՝ Դավիթ Գրիգորյանի նկատմամբ։ Մինչդեռ դատախազը դիմել է ԲԴԽ միայն մեղադրանք առաջադրելիս։

«Քրեական դատավարության օրենսգրքի 192-րդ հոդվածը հստակ սահմանում է, որ նախաքննությունը սկսվում է քրեական գործ հարուցելու մասին որոշման կայացման պահից։ Եթե քրեական գործ հարուցելու մասին որոշումը ոչ իրավաչափ է դառնում, բացառվում է նախաքննության իրականացումը»,- «Փաստինֆո»-ին տված հարցազրույցում ասել է դատավորի փաստաբան Գեորգի Մելիքյանը։

Այսինքն՝ քրեական գործը ենթակա է կարճման։ Սակայն դատարանի կողմից արձանագրված խախտումները վերացնելու փոխարեն՝ դատախազությունը եւս երկու ամսով երկարացրել է նախաքննության ժամկետը։

Ի դեպ, նշենք, որ դատավորի փաստաբան Գեորգի Մելիքյանը «Փաստինֆո»-ին հայտնել է, որ արդեն մի քանի ամիս է, ինչ դատավորի մասնակցությամբ որեւէ քննչական գործողություն չի կատարվում։

Հիշեցնենք, որ Դավիթ Գրիգորյանն այն դատավորն է, որը մայիսի 18-ի որոշմամբ ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը։ Այդպիսի միջնորդությամբ դատարանում հանդես էին եկել Արցախի գործող եւ նախկին նախագահները, իսկ մայիսի 20-ին որոշում էր կայացրել նաեւ քրեական գործի վարույթը կասեցնելու եւ ՍԴ դիմելու մասին։

Այս որոշումից հետո քրեական գործ հարուցվեց դատավորի նկատմամբ ու մեղադրանք առաջադրվեց ՀՀ քրեական օրենսգրքի 314-րդ հոդվածի 1-ին մասի հատկանիշներով՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու համար։ Նրա լիազորությունները ժամանակավորապես կասեցվել են։

Հեղինակ՝ Իզաբել Սահակյան

Աղբյուր` Փաստինֆո