Փաստ ինֆո

«Այն, որ դատավոր Դավիթ Գրիգորյանի գործը ձեւականորեն է պահվում, դա փաստ է եւ քանի որ Դավիթ Գրիգորյանի նկատմամբ քաղաքական–քրեական գործ է հարուցված՝ քաղաքական դրդապատճառներով ու քաղաքական ցուցումով, այն կարճվելու է եւս քաղաքական ցուցումով»,-«Փաստինֆո»-ի հետ զրույցում նման կարծիք հայտնեց փաստաբան Երվանդ Վարոսյանը՝ անդրադառնալով դատավոր Դավիթ Գրիգորյանի դեմ հարուցված քրեական գործին։

Նախօրեին Դավիթ Գրիգորյանի փաստաբան Գեորգի Մելիքյանը «Փաստինֆո»-ին ասել էր, որ Վերաքննիչ քրեական դատարանն արձանագրել է, որ քրեական գործը հարուցելիս Երևանի ընդհանուր իրավասության դատարանի դատավոր Դավիթ Գրիգորյանի գործառութային անձեռնմխելիությունը չի հաղթահարվել։

Երվանդ Վարոսյանը շեշտեց, որ տեւական ժամանակ է անցել այն բանից հետո, ինչ Վճռաբեկ դատարանը հրաժարվել է վարույթ ընդունել դատախազության բողոքը, բայց գործը ինչպես անշարժ՝ սառած մնում էր, այդպես էլ մնում է։

Երեւան Վարոսյանը շեշտեց՝ Վերաքննիչ դատարանը համարել է, որ դատավորի աշխատասենյակում խուզարկության վերաբերյալ թույլտվություն տալու որոշումն առհասարակ Առաջին ատյանի դատարանն իրավունք չուներ կայացնել, քանի որ արդեն իսկ փաստացի քրեական հետապնդում է իրականացվելիս եղել Դավիթ Գրիգորյանի նկատմամբ եւ այդ պահի դրությամբ, ԲԴԽ-ի կողմից համապատասխան թույլտվությունը չի եղել։ «Խնդիրը կայանում է հետեւյալում՝ քրեական գործ հարուցելու որոշմամբ իսկ արդեն նշված է Դավիթ Գրիգորյանի անունը՝ որպես ենթադրյալ հանցագործություն կատարողի, ինչը նշանակում է, որ անկախ նրանից, մեղադրանքը ձեւականորեն կառաջադրվեր, թե ոչ, այդ պահի դրությամբ արդեն նա քրեական հետապնդման է ենթարկվել, բայց ենթարկվելով քրեական հետապնդման, ԲԴԽ թույլտվություն այդ պահին չի եղել, ինչը նշանակում է, որ քրեական գործի հարուցումից հետո իրականացված բոլոր քննչական ու դատավարական գործողությունները առոչինչ են»,-բացատրեց Վարոսյանը։

Երվանդ Վարոսյանը պատահական չհամարեց, որ Վերաքննիչ դատարանի կողմից կայացված որոշումը բողոքարկելով Վճռաբեկ դատարան, դատախազությունը ինքը բողոքի մեջ նշել է, որ եթե ուժի մեջ մնա Վերաքննիչ դատարանի որոշումը, ապա անհնար է լինելու քրեական հետապնդում իրականացնել Դավիթ Գրիգորյանի նկատմամբ։

«Այս պահի դրությամբ, արդեն իսկ դատախազության բողոքը Վճռաբեկ դատարանը վարույթ չի ընդունել եւ այո, այս մասով ես համաձայն եմ դատախազության այն դիրքորոշմանը, որ այլեւս քրեական հետապնդում չի կարող իրականացվել Դավիթ Գրիգորյանի նկատմամբ»,-ասաց Երվանդ Վարոսյանը՝ շեշտելով, սակայն, որ խոսքն այն մասին է, թե ինչ պետք է արվի օրենքով, իսկ այն, ինչ կանի այսօրվա ՀՔԾ-ն, ըստ Վարոսյանի միայն մեկ մարդու է հայտնի։

«Երբ ես ասում եմ, որ միակ օրինական լուծումը այն է, որ քրեական հետապնդում չի կարող իրականացվել եւ գործը ենթակա է կարճման, չի նշանակում, որ իրենք հենց դա էլ անելու են։ Ժամանակը ցույց կտա՝ ապօրինությունների շղթան շարունակվելո՞ւ է Դավիթ Գրիգորյանի նկատմամբ, թե ի վերջո, կանգ է առնելու»,-նկատեց Վարոսյանը՝ եւս մեկ անգամ շեշտելով, որ Վերաքննիչ դատարանի արտահայտած դիրքորոշումը, որն այլեւս իրավական ուժի մեջ մտած ակտ է դարձել, քրեական հետապնդումը շարունակելու որեւէ տարբերակ չի թողնում։

Հիշեցնենք, որ Դավիթ Գրիգորյանն այն դատավորն է, որը, 2019 թ.-ի մայիսի 18-ի որոշմամբ, հիմք ընդունելով Արցախի գործող նախագահ Բակո Սահակյանի եւ նախկին նախագահ Արկադի Ղուկասյանի միջնորդությունը, փոխեց ՀՀ 2–րդ նախագահ Ռոբերտ Քոչարյանի խափանման միջոց կալանքը։
Դատարանի այս որոշումից հետո քրեական գործ հարուցվեց դատավորի նկատմամբ, նրա աշխատասենյակում օրենքի խախտմամբ կատարվեց խուզարկություն, դուռը կնիքվեծ ու մեղադրանք առաջադրվեց ՀՀ քրեական օրենսգրքի 314-րդ հոդվածի 1-ին մասի հատկանիշներով՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու համար։ Նրա լիազորությունները ժամանակավորապես կասեցվել են։

Աղբյուր` Փաստինֆո