Փաստ ինֆո

Եթե որևէ գործողություն կատարեն, հայտնվելու են տուժողի իրավահաջորդի դատավարական կարգավիճակում, այսինքն ունենալու են սպանված, մահացած հարազատ, այդ արտահայտությունը, եթե նորմալ են գնահատում և թույլատրելի է դատական նիստի ժամանակ, ապա մենք ևս պետք է հնարավորություն ունենանք նման վարքագիծ և նման խոսելաձև ունենալու։ Լրագրողների հետ զրույցում այս մասին ասաց Յուրի Խաչատուրովի պաշտպան Միհրան Պողոսյանը։

«Դատարանը հասկանում է, որ այստեղ խնդիր կա։ Հակառակ պարագայում դատարանը պարզաբանումներ չէր պահանջի պարոն Հարությունյանից։ Ուղղակի դատարանի գործողություններն ուշացած էին։ Ես փորձում էի առարկել նախագահող դատավորի գործողությունների դեմ, որովհետև նախորդ դատական նիստին տեղի ունեցածը՝ իմ կողմից ներկայացված դիմումը, դատարանին հիմք էր տվել ենթադրելու, որ առնվազն այստեղ խնդիր կա։ Եթե դատարանը գտնվեր իր դերում, այս հարցուպատասխանը պետք է տեղի ունենար հունվարի 9-ին՝ հենց նման արտահայտություն հնչեցնելուց հետո»,-նշեց Միհրան Պողոսյանը։

Վերջինս ընդգծեց՝ դատարանն ինչ-որ կաշկանդվածություն ունի տուժող կողմի նկատմամբ և այժմ պաշտպանի խոսքով դատարանը փորձում է այդ արտահայտության տրամաբանությունը հասկանալ, ինչը Միհրան Պողոսյանի գնահատմամբ արդեն օբյեկտիվ չէ և տուժողի իրավահաջորդը հունվարի 9-ին արդեն իր դիրքորոշումն արտահայտել է։

Անդրադառնալով մեղադրող դատախազ Պետրոս Պողոսյանի կարծիքին, որ պաշտպանները միտումնավոր ձգձգում են դատական նիստերը՝ Միհրան Պողոսյանը նկատեց՝ որևէ միտում չկա դատական նիստերը հետաձգելու. «Դատական նիստերը շարունակվում են։ Եթե այժմ շատ ավելի դժվար է ընկալվում, որ այստեղ այսպես ասած «ջուր քրեական» գործ է, դատական հենց առաջին մի քանի նիստերով առավել ակնհայտ է լինելու, որ այստեղ օրինական քրեական հետապնդման մասին խոսելն ավելորդ է, ուստի ձգձգման միտում չունենք։ Սակայն ես ինքս չեմ պատրաստվում մասնակցել մի գործընթացի, որտեղ չի երաշխավորվել ու ապահովվել իմ իրավունքների և պարտականությունների ամբողջական կիրարկումը»,-նշեց պաշտպանը։

Հարցին՝ այսինքն հաջորդ նիստին չի՞ ներկայանա, Միհրան Պողոսյանն ասաց. «Յուրաքանչյուր նիստից առաջ դատարանի գործողությունները գնահատման եմ ենթարկում և տրամաբանությունը, թե ուր են տանում գործողությունները»,-նշեց Միհրան Պողոսյանը․

Դիտարկմանը, որ անընդմեջ դատական նիստերից բացակայելով կհեռացվի, Միհրան Պողոսյանն արձագանքեց. «Դա արդեն օրենքով սահմանված իմ պարտականությունը ևս ես քաջ տիրապետում եմ, և ես իմ գործողությունները կատարում եմ լավագույնս ապահովելու պարոն Խաչատուրովի պաշտպանության իրավունքը»,-ասաց պաշտպանը։

Հարցին՝ արդյոք մտավախություն չունի, որ վարույթից կհեռացվի, Յուրի Խաչատուրովի պաշտպանն ասաց. «Բացարձակապես։ Օրինական հիմքերով ինձ այս պահին հեռացնելու իրավունք չունեն»,-հավելեց Միհրան Պողոսյանը։

Մանրամասները՝ տեսանյութում

Հեղինակ՝ Հասմիկ Կոշկարյան

Աղբյուր` Փաստինֆո