Փաստ ինֆո

Խորհրդարանն այսօր երկրորդ ընթերցմամբ և ամբողջությամբ ընդունեց «Պետական կառավարման համակարգի մարմինների մասին» օրենքում փոփոխություն և լրացում կատարելու մասին և «Կառավարչական իրավահարաբերությունների կարգավորման մասին» օրենքում փոփոխություն կատարելու մասին օրենքի նախագծերի փաթեթը, «Նորմատիվ իրավական ակտերի մասին» ՀՀ օրենքում լրացումներ կատարելու մասին օրենքի նախագիծը, «Հանրային ծառայության մասին» օրենքում լրացումներ և փոփոխություններ իրականացնելու մասին և կից ներկայացված օրենքների նախագծերի փաթեթը,  ԱԺ պատգամավորներ Նաիրա Զոհրաբյանի, Վահե Էնֆիաջյանի, Շաքե Իսայանի և Արման Աբովյանի ներկայացրած «ՀՀ քրեական օրենսգրքում» լրացում կատարելու մասին օրենքի նախագիծը։

Երկրորդ ընթերցմամբ ընդունվեց նաև ԱԺ պատգամավոր Վաղարշակ Հակոբյանի ներկայացրած «Հանրային ծառայության մասին» ՀՀ օրենքում փոփոխություն կատարելու մասին օրենքի նախագիծը, որով նախատեսվում է իջեցնել խորհրդարանում պաշտոն զբաղեցնելու համար սահմանված տարիքային շեմը։ Պատգամավորն առաջարկում է խորհրդականի պաշտոն զբաղեցնելու համար օրենքով սահմանված տարիքը, որը 30 տարեկանն է, փոխարինել՝ 25-ով, իսկ խորհրդականի պաշտոնի անձնագրով նախատեսված 5 տարվա աշխատանքային ստաժը՝ 3-ով:

ԱԺ-ն առաջին ընթերցմամբ կողմ քվեարկեց նաև «Լուսավոր Հայաստան» խմբակցության ներկայացրած  «ՀՀ քաղաքացիական օրենսգրքում» փոփոխություններ կատարելու մասին օրենքի նախագիծը, «Քաղաքացիական կացության ակտերի մասին» ՀՀ օրենքում լրացում կատարելու մասին օրենքի նախագիծ, ինչպես նաև «Իմ քայլը» խմբակցության պատգամավոր Գևորգ Պապոյանի ներկայացրած «Վարչական իրավախախտումների վերաբերյալ» ՀՀ օրենսգրքում լրացումներ և փոփոխություն կատարելու մասին օրենքի նախագիծը։

Աղբյուր` Փաստինֆո