Փաստ ինֆո

Առաջատար տեխնոլոգիաների ձեռնարկությունների միության գործադիր տնօրեն Կարեն Վարդանյանը ակնկալում է, որ կառավարությունը համապատասխան որոշմամբ կլուծի «Արմաթ» ինժեներական լաբորատորիաների տեղադրման ֆինանսավորման խնդիրը։ Այս մասին «Փաստինֆո»-ի հետ զրույցում ասաց Առաջատար տեխնոլոգիաների ձեռնարկությունների միության գործադիր տնօրեն Կարեն Վարդանյանը։

«Կառավարությունը կարող է համապարփակ ծրագիր ընդունել, ասենք, մոտակա 6-10 տարվա համար, այս տարի պահուստային ֆոնդից ֆինանսավորվի, իսկ եկող տարվանից՝ բյուջեից»,-ասաց Կարեն Վարդանյանը ՝ հավելելով. «Մենք բարձրաձայնել ենք խնդիրը եւ հուսով ենք, որ կառավարությունն աչալուրջ կլինի»։

Հիշեցնենք, Կարեն Վարդանյանն ահազանգել էր , որ Կրթության, գիտության, մշակույթի եւ սպորտի նախարարությունում սաբոտաժ է արվում եւ «Արմաթ» ինժեներական լաբորատորիաների տեղադրման ֆինանսավորումը դադարեցվում է, ինչին ի պատասխան, ԿԳՄՍ նախարարն արձագանքել էր, թե « Կարեն Վարդանյանն ընդամենը վեց աշխատանքային օր առաջ է ստացել ավելի քան 800 միլիոն դրամ երեք մարզում 284 նոր լաբորատորիա ներդնելու համար և «իր լավագույն երազում չէր տեսնի լաբորատորիաների թվի կրկնապատկում ընդամենը չորս ամսում»:

«Բյուջեում, նրա խոսքով, ներառված է միայն խմբակավարների աշխատավարձի տողը, որը շուրջ պայմանավորվածությունը դեռ Հովիկ Աբրահամյանի կառավարության շրջանից է եղել։

Մեզ հետ զրույցում Կարեն Վարդանյանը հիշեցրեց, որ 2019 թվականին Շիրակի, Լոռու եւ Տավուշի մարզերի բոլոր դպրոցներում «Արմաթ» ինժեներական լաբորատորիաներ են ստեղծվել, իսկ մյուս մարզերում ծածկույթը մոտավորապես 15-20 տոկոսի է հասնում։

«Խոսքը գնում էր այն մասին, որ ամբողջ Հայաստանում ամբողջությամբ ավարտվեր ծրագիրը»,-ասաց Կարեն Վարդանյանը՝ հավելելով, որ Հայաստանը միջազգային մրցակցության մեջ է եւ որքան ավելի արագ կադրեր պատրաստվեն այնքան առաջընթաց կլինի։

Կարեն Վարդանյանը կարծում է, որ վարչապետ Նիկոլ Փաշինյանը տեղյակ է խնդրից։ Դիտարկմանը, թե իր կարծիքով, ինչո՞ւ մինչեւ այժմ կառավարության ղեկավարի կողմից արձագանք չի եղել Կարեն Վարդանյանն ասաց.«Կարծում եմ, որ երկրում իրավիճակը մի քիչ բարդ է եւ մեզ դեռ ձեռքերը չեն հասնում»։

Առհասարակ, Կարեն Վարդանյանը դժգոհ չէ ՏՏ ոլորտում կառավարության որդեգրած քաղաքականությունից, կարծում է՝ կառավարությունը ճիշտ ուղղության վրա է։ «Այն խնդիրները, որ ենք դրել էինք, այսօր լուծվել են, մասնավորապես, բանակից դուրս է եկել ռազմարդյունաբերությունը, ստեղծվել է բարձր տեխնոլոգիաների նախարարություն, որը ճիշտ բաժանված է՝ ըստ խնդիրների, կառավարության ծրագրի մեջ նշված է, աշխատանքներն ընթանում են, ՏՏ համաշխարհային կոնֆերանս իրականացված է»,-ասաց Կարեն Վարդանյանը՝ հավելելով, որ ամեն ինչ կարող էր ավելի արագ ընթանալ, ինչը սակայն, ըստ ոլորտի մասնագետի, նաեւ օրենսդրական փոփոխություններով է պայմանավորված։

Աղբյուր` Փաստինֆո