Փաստ ինֆո

ԱԺ «Իմ քայլը» խմբակցության պատգամավորներ Վլադիմիր Վարդանյանն ու Արուսյակ Ջուլհակյանը Անի Սամսոնյանից հետաքրքրվեցին, թե ԱԺ կանոնակարգ օրենքի ո՞ր կետի համաձայն է ստեղծվել Երևան համայնքին տրանսպորտային միջոցների և այլ գույքի փոխանցման, ծառայությունների մատուցման պայմանագրերի և Երևան համայնքի կողմից դրանց հետ կապված այլ անշարժ կամ շարժական գույքի փոխանցման գույքային և ոչ գույքային իրավունքների, շինարարության թույլտվությունների, արտոնությունների տրամադրման իրավաչափությունն ու կոռուպցիոն ռիսկերն ուսումնասիրելու նպատակով քննիչ հանձնաժողովը։

Նշենք, որ հանձնաժողովի նախագահը ԼՀԿ պատգամավոր Անի Սամսոնյանն է։

Մասնավորապես, Վլադիմիր Վարդանյանը նշեց, որ այս կերպ հանձնաժողովը մխրճվելու է ՏԻՄ դաշտ ու հարցրեց, թե արդյոք ԱԺ իրավասության մեջ են մտնում հանձնաժողովի բարձրացրած հարցերը։

«Այս հանձնաժողովի համար տրվել է եզրակացություն այս ինստիտուտի փորձագիտական-իրավաբանական վարչության կողմից և ասվում է, որ այս հանձնաժողովը համապատասխանում է ՀՀ Սահմանադրությանը, սա նաև ենթադրում է, որ այս հանձնաժողովի տիրույթում տեղ գտած հարցերի շրջանակն ու դրանց քննարկումը ևս համապատասխանում է ՀՀ Սահմանադրությանը ու մենք բարձրացնում ենք մի հարց, որը կարող է քննարկել օրենսդիր մարմինը։ ՀՀ-ում ՏԻՄ մարմինները բացարձակ անկախ չեն և նաև ՀՀ Սահմանադրությամբ է ամրագրված, որ պետական լիազորված մարմինները ՏԻՄ մարմինների նկատմամբ ունեն իրավական և մասնագիտական վերահսկողության իրավունք»,-պատասխանելով Վարդանյանի հարցին ասաց Սամսոնյանը։

Արուսյակ Ջուլհակյանն էլ խնդրեց հստակ նշել, թե ԱԺ ո՞ր իրավասության շրջանակներում է առաջարկվել ստեղծել քննիչ հանձնաժողովը, Սամսոնյանն էլ ասաց. «Ես նորից պետք է ընթերցեմ Ձեզ համար եզրակացությունը, որովհետև այն ընդունվել է այս ինստիտուտի կողմից, որի գլուխը Արարատ Միրզոյանն է, եթե Դուք ունեք որևէ խնդիրներ կամ կասկածներ այս քննիչ հանձնաժողովի իրավասության, օրինականության վերաբերյալ, ուրեմն պետք է դիմեք պարոն Միրզոյանին։

Բայց եթե պարոն Միրզոյանն ընդունել է այդ որոշումը և կա ԱԺ որոշում, որ դա ԱԺ իրավասությունների տիրույթում է և կարող է քննվել, ուրեմն այստեղ հարց է ծագում, որ կամ ձեր ԱԺ նախագահին չեք վստահում, կամ փորձում եք քննիչ հանձնաժողովի օրինականությունը վարկաբեկել։ Որմե՞կն է»։
Սամսոնյանի այս խոսքերին արձագանքեց ԱԺ նախագահն ու ժպիտով ասաց. «Հը՞, տիկին Ջուլհակյան»։

Արուսյակ Ջուլհակյանն էլ ասաց, որ երբ ունենում է հարց ուղղված Արարատ Միրզոյանին կամ ԱԺ համապատասխան սորաբաժանումներին՝ հարցն ուղղում է նրանց, սակայն այս դեպքում քննիչ հանձնաժողովի ստեղծման առաջարկ արել է Սամսոնյանը և դրա համար է նրանից ակնկալում հարցի պատասխանը։
Անի Սամսոնյանն էլ պատասխանեց, քանի որ Արուսյակ Ջուլհակյանը բոլոր դեպքերում հղում է անում ԱԺ կանոնակարգին ու իրավասությանը, ուրեմն կպատասխանի ԱԺ կանոնակարգ օրենքի սահմաններում ու կասի, որ ԱԺ կանոնակարգ օրենքի համաձայն, եթե դիմումն անհրաժեշտ թվով պատգամավորներ չեն ստորագրել կամ այն օրենքի 3-րդ կամ 4-րդ մասերի պահանջին չի համապատասխանում ու 3 աշխատանքային օրվա ընթացքում դրանց չի համապատասխանեցվում, ապա ԱԺ նախագահը վերադարձնում է դիմումը նշելով պատճառների մասին։

«ԼՀԿ-ին դիմում չի վերադարձվել, իսկ ինչու չի վերադարձվել, խնդրում եմ այդ հարցով դիմել ԱԺ նախագահ, իմ շատ հարգելի գործընկեր, իմ կողմից մեծապես սիրված Արարատ Միրզոյանին, որի հեղինակության հետ դուք հիմա խաղում եք»,-ասաց Սամսոնյանը։

Միրզոյանն էլ ժպտալով ասաց. «Ես խնդրում եմ, իմ հեղինակության հետ ոչ մի խմբակցություն չխաղա։ Մինչ տիկին Սամսոնյանը կհասնի աթոռին, որոշ պարզաբանում տամ. Մեր կանոնակարգը որոշ հարցերի անդրադառնում է, որոշ հարցերի, ցավոք, ոչ և ահա այս հարցի կապակցությամբ, կանոնակարգ օրենքն ասում է, որ անհրաժեշտ թվով ստորագրություններ հավաքվելու դեպքում իրավունքի ուժով քննիչ հանձնաժողովը ստեղծվում է, և եթե ստորագրությունների թիվի և անհրաժեշտ փաստաթղթերի հետ կապված խնդիր չկա, ԱԺ նախագահը հայտարարում է այդ մասին»։

Հեղինակ՝ Սոնա Գեւորգյան

Աղբյուր` Փաստինֆո