Փաստ ինֆո

Քննիչ հանձնաժողով ստեղծվում է Ազգային ժողովում և ոչ թե Երևանի ավագանիում, քանի որ ավագանին այսօր չունի անհրաժեշտ կարողություններ ու կամք վերահսկողական գործառույթներ իրականացնելու համար։ Այս մասին այսօր Ազգային ժողովում ասաց «Լուսավոր Հայաստան» կուսակցության պատգամավոր Անի Սամսոնյանը։

Հիշեցնենք, որ Երևան համայնքին տրանսպորտային միջոցների և այլ գույքի փոխանցման, ծառայությունների մատուցման պայմանագրերի և Երևան համայնքի կողմից դրանց հետ կապված այլ անշարժ կամ շարժական գույքի փոխանցման գույքային և ոչ գույքային իրավունքների, շինարարության թույլտվությունների, արտոնությունների տրամադրման իրավաչափությունն ու կոռուպցիոն ռիսկերն ուսումնասիրելու նպատակով իրավունքի ուժով ստեղծվել է ԱԺ քննիչ հանձնաժողով, որի ղեկավարը Անի Սամսոնյանն է։

Նա նշեց, որ ավագանին չունի բավարար պատշաճ մակարդակ, որպեսզի քննարկի կոռուպցիային վերաբերող հարցեր. «Շատ կարևոր է, որ քննիչ հանձնաժողովին մասնակցող անձինք նման հարցերի վերաբերյալ քննադատական մտածողություն ունենան, որպեսզի վեր հանենք բոլոր թերությունները և բարելավենք դաշտը»։

Սամսոնյանն ընդգծեց՝ բարձր կարծիք չունի Երևանի ավագանու մասին և չի պատրաստվում այս հարցը վստահել Երևանի ավագանու կամքին ու ցանկությանը։

Աղբյուր` Փաստինֆո