Փաստ ինֆո

Մենք այս օրինագծով ԶԼՄ-ներին տալիս ենք իրավունք, բայց մենք հաճախ խուսափում ենք ԶԼՄ-ներին պատասխանատվության կանչելուց։ Ազգային ժողովում ԶԼՄ-ների վերաբերյալ օրինագծի քննարկման ժամանակ այս մասին ասաց «Իմ քայլը» խմբակցության պատգամավոր Հովհաննես Հովհաննիսյանը։

Պատգամավորը նկատեց՝ խուսափում են ԶԼՄ-ներին պատասխանատվության կանչելուց, որովհետև մշտապես մտածում են՝ խոսքի ազատության խնդիր կա և խոսքի ազատության ու պատասխանատվության սահմանը բավականին բարդ է. «Մշտապես, երբ ԶԼՄ-ների հետ կապված որևէ հարց է լինում, առաջին պլան է գալիս մամուլի նկատմամբ ճնշումներ և այլն։ Բայց երբ մամուլն է ճնշում, մամուլն է սուտ ու կեղծիք տարածում, այդ մասին մենք որևէ քայլ չենք անում և դա բերում է բացարձակ թողտվության։ Երբ թերթեք մեր մամուլի միջոցները, եթե կարելի է դրանք մամուլի միջոցներ համարել, մաղձ է թափվում այդ մամուլի միջոցներից։ Երբ խոսք է գնում երկրում ատելության մթնոլորտի մասին հենց այդ մամուլի միջոցներն են, որ երկրում տարածում են այդ ատելության մթնոլորտը։ Իշխանությունը չի տարածում, ընդդիմությունը չի տարածում և մամուլի միջոցներն են, որ միայն տարածում են՝ կոնկրետ պատվերով, կոնկրետ նպատակի համար»,-նշեց Հովհաննես Հովհաննիսյանը։

Վերջինս, դիմելով ԱՆ փոխնախարարին, նշեց՝ իրավունքներից բացի նաև պետք է մտածել պատասխանատվության, թափանցիկության, հաշվետվողականության հետ կապված. «Եթե մամուլը թափանցիկ և հաշվետվողական չեղավ, նա իրավունք չունի թափանցիկություն և հաշվետվողականություն պահանջել որևէ մեկից»,-հավելեց պատգամավորը։

Նշենք, որ այժմ քննարկվում է «Իրավաբանական անձանց պետական գրանցման», «Իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման մասին» օրենքում լրացումներ կատարելու մասին և կից ներկայացված օրենքների նախագծերի փաթեթ առաջին ընթերցմամբ ընդունելու մասին հարցը։

Հարցը զեկուցող Արդարադատության փոխնախարար Սրբուհի Գալյանը նշեց՝ նախագծերի փաթեթով լուծվում է մեկ կարևոր խնդիր. «Լրատվական գործունեություն իրականացնողների համար նախատեսվում է հնարավորություն, որպեսզի կարողանան առանց պետտուրք մուծելու, պետական միասնական գրանցամատյանում առկա տեղեկություններ ստանալ՝ ներկայացնելով համապատասխան հայտ»,-ասաց ԱՆ փոխնախարարը։

Աղբյուր` Փաստինֆո