Փաստ ինֆո

Ուղղակի ապշած եմ, ինչպես կարելի է կապել ներդրողներին և այս կարգավորումը։ ԱԺ-ում «Բանկային գաղտնիքի մասին» օրենքում փոփոխություն իրականացնելու մասին նախագծի քննարկման ժամանակ ասաց ԱԺ «Իմ քայլը» խմբակցության պատգամավոր Ծովինար Վարդանյանը։

«Այս նախագիծը նախատեսված է այն մարդկանց համար, ովքեր կոռուպցիոն կամ որևէ այլ հանցավոր կերպ ձեռք բերած գումարները երրորդ անձի հաշվի միջոցով կարգավորել են և կառավարել։ Բնականաբար այդ մարդիկ ցույցերի դուրս չեն գալու, որովհետև չեն ցանկանա որևէ մեկի աչքին երևալ»,-նշեց պատգամավորը։

Նա ընդգծեց՝ Կենտրոնական բանկը մինչ օրս անառիկ է պահել բանկային գաղտնիքը և շարունակելու է. «ԿԲ-ի թույլտվությամբ և համաձայնությամբ է այս օրենքը մտել այստեղ։ Նենց որ Պապից ավելի կաթոլիկ չլինենք»,-ասաց Ծովինար Վարդանյանը։

Նշենք, որ խորհրդարանն այժմ քննարկում է «ՀՀ քրեական դատավարության օրենսգրքում» լրացում կատարելու մասին և «Բանկային գաղտնիքի մասին» ՀՀ օրենքում լրացում կատարելու մասին օրենքի նախագծերի փաթեթը երկրորդ ընթերցմամբ և ամբողջությամբ ընդունելու հարցը։

Նախագծով նախատեսվում է քրեական գործի շրջանակներում բանկային գաղտնիքի հասանելիության հնարավորություն ընձեռել։ Արդարադատության նախարար Ռուստամ Բադասյանն իր ելույթում նկատեց՝ սա չի նշանակում, որ գնում են այն ճանապարհով՝ օրենքով պահպանվող գաղտնիքներն ընդհանրապես դառնան հանրամատչելի, ինչը կարգավորող մի շարք երաշխիքներ են ամրագրել։

Աղբյուր` Փաստինֆո