Փաստ ինֆո

Հեղափոխությունից շուրջ 2 տարի անց լրջագույն խնդիրներ ունենք պետության ու հասարակության կենսագործունեության համար կենսական նշանակության ոլորտներում՝ իրավապահ մարմիններում և դատական համակարգում։ Այս մասին այսօր Ազգային ժողովում հայտարարեց անկուսակցական պատգամավոր Արման Բաբաջանյանը։

Նա նշեց, որ միայն մղձավանջային երազում կարելի կլիներ պատկերացնել, որ հեղափոխությունից հետո Ոստիկանապետի պաշտոնը զբաղեցրած անձը դառնալու է ռուսահայ օլիգարխներից մեկի «ախրանիկը», իսկ ԱԱԾ ղեկավարը պաշտոնաթողությունից հետո, ամեն օր սպառնալու է իշխանությանը շանտաժներով ու այլ գրառումներով։

«Այս ամենի հետևանքով այսօր երկրում կրկին գլուխ է բարձրացրել հանցավորությունը և դրա հետևանքն է այն իրողությունը, որ հեղափոխությունից հետո վախվորած օլիգարխներն այսօր սկսել են վերանվաճել իրենց նախկին դիրքն ու ազդեցությունը։ Դրան գումարվում է նաև անցյալի մնացուկ դատական համակարգի խայտառակ պատկերը, իսկ երկրում գոյություն ունեցող Սահմանադրական ճգնաժամն ու այն հաղթահարելու իշխանության անկարողությունը, այդ ուղղությամբ ձեռնարկված անհեռանկար ու անօգուտ քայլերը ավելի ամբողջական են դարձնում պետության ներքին կայունությանն ու անվտանգությանը սպառնացող պատկերը»,-ասաց Բաբաջանյանը։

Նրա խոսքով, ընդհուպ մինչև 2017թ-ի համապետական ընտրությունների պաշտոնական արդյունքների վավերացմամբ պետության զավթումը վավերացրած ՍԴ անդամները շարունակում են դիրքավորված մնալ հատուկ «Ռ. Քոչարյանի և Ս. Սարգսյանի, նրանց կամակատար, հանցագործ, թալանչի պաշտոնյաների պաշտպանության համար փորված խրամատում»։

«Մամուլում ՍԴ առանձին անդամների վերաբերյալ անհանգստացնող հրապարակումներ կան, որոնք ոչ միայն սասանում են ՍԴ-ի հեղինակությունը, այլև մեծապես հարվածում են մեր պետության ինքնիշխանությանն ու անվտանգությանը։ Ստեղծված իրավիճակի պատճառով, օլիգարխները, որոնք հեղափոխությունից հետո մկան ծակ էին փնտրում մտնելու համար, հիմա վերստանձնում են իրենց դիրքերը և կազմավորում նախկին բանդաները, որովհետև խոսքից բացի ուրիշ ոչինչ չի եղել մեզանում։ 2 տարվա մեջ թալանչի ոչ մի օլիգարխի ու նախկին պաշտոնյայի դեմ օրինական ուժի մեջ մտած ոչ մի դատավճիռ չկա»,-ասաց պատգամավորը։

Աղբյուր` Փաստինֆո