Փաստ ինֆո

Կարծում եմ՝ պարոն Աբովյանը, ԲՀԿ-ն, ինչպես նաև պարոն Ծառուկյանը այսօր երեկոյան հավաքվելու և կարգապահական առումով շատ լուրջ քննարկելու բան ունեն, որովհետև ամեն անգամ հրահրել և նման իրավիճակ ստեղծել ԱԺ դահլիճում, անընդունելի եմ համարում։ Լրագրողների հետ զրույցում այս մասին ասաց ԱԺ փոխնախագահ Ալեն Սիմոնյանը՝ անդրադառնալով այսօր խորհրդարանում պատգամավորների միջև տեղի ունեցած ընդհարմանը։ Վերջինս նաև ՀՀ քաղաքացիներից ներողություն խնդրեց կատարվածի համար։

Դիտարկմանը, որ Գևորգ Պետրոսյանը նշել է՝ աշխարհի շատ երկրներում են նման բաներ լինում, Ալեն Սիմոնյանն ասաց՝ չի կիսում Գևորգ Պետրոսյանի կարծիքը։ Աշխարհի տարբեր խորհրդարաններում տարբեր բաներ կարող են լինել. «Մեր խորհրդարանում նման բան չի կարող լինել։ Այսինքն ի՞ նչ, ինքը նորմալ է համարում, որ վաղն ինչ-որ մեկը մոտենա, հարվածի իր դեմքի՞ն։ Ես կարծում եմ՝ ինքը հին աշխարհում մնացած մի անձնավորություն է, որը չի հասկացել և դժվար թե հասկանա, թե ՀՀ-ում ինչ է տեղի ունեցել»,-ասաց Ալեն Սիմոնյանը՝ ընդգծելով՝ խորհրդարանը Գևորգ Պետրոսյանի նման պատգամավորների տեղը չէ։

ԱԺ փոխնախագահը նկատեց՝ ԱԺ-ում տեղի ունեցածն ակնհայտ ենթամշակույթի դրսևորում է. «Ես նաև տեսա հարցազրույցի ժամանակ իր արձագանքը, իր խոսքի ձևը, ոճը, լրագրողների հետ խոսելու ոճը, կեցվածքը, էդ այ սենց քայլելը, սև շորեր հագնելը։ Ես անկեղծ ասած ապշած եմ զուտ տարրական չափանիշների բացակայությամբ։ Էդ ի՞նչա ընդհանուր առմամբ»,-նշեց ԱԺ փոխնախագահը։

Վերջինս հավելեց, որ ընդհարման ժամանակ հնչել է նաև սեռական բնույթի հայհոյանք։ Ալեն Սիմոնյանի վստահեցմամբ նման բաները Նոր Հայաստանի խորհրդարանում տեղ չունեն. «Էթիկայի հանձնաժողովից բացի կարծում եմ՝ կլինեն այլ արձագանքներ, որոնց ականատես կլինեք, և այդ արձագանքը վստահեցնում եմ՝ տեղ կհասնի»,-ասաց ԱԺ փոխնախագահը։

Աղբյուր` Փաստինֆո