Փաստ ինֆո

«Հավատացեք, ես չեմ զարմանա, որ Հուլիոս Կեսարի սպանության հետ կապված էլ ասվի՝ քո անունը համընկնում է Բրուտոսի անվան հետ, այս գործը պիտի քննվի։ Այսինքն, այսքան աբսուրդի է հասել ամեն ինչ,- «Փաստինֆո»-ին հետ զրույցում ասաց «Ազգային անվտանգություն» կուսակցության ղեկավար Գառնիկ Իսագուլյանը անդրադառնալով Նաիրի Հունանյանի՝ վարչապետ Փաշինյանին ուղղված նամակին եւ Պողոս Պողոսյանի սպանության գործով նոր դատաքննության պահանջով ՀՀ վերաքննիչ դատարան ներկայացված դատախազության բողոքին։

Իսագուլյանը շեշտեց՝ երկու դեպքում էլ գործերը մանրակրկիտ քննվել են, մտել են դատարան եւ առկա են օրինական ուժի մեջ մտած դատավճիռներ կան եւ նշեց, որ զարմանալի չէ, թե ինչու են հենց հիմա նոր հանգամանքներ երեւան գալիս տարբեր գործերում։ «Դա տարօրինակ չէ, որովհետեւ գործը գործի վրա փլուզվում է։ Տեսեք, Ռոբերտ Քոչարյանի հետ կապված, այն ինչ մեղադրանք առաջադրվել է նրան, ինչի համար կալանավորել են նրան եւ այն, թե ինչ է տեղի ունենում դատարանում, իրար հետ բացարձակապես կապ չունեն ։ Զոհերի վերաբերյալ դեռ գործ չկա, բայց զոհերի հարազատները , չգիտես ինչու, նստած են դատարանում, իրավունք են ստանում խոսելու, հայտարարություններ անելու, դիրքորոշումներ ներկայացնելու։ Արմեն Թավադյանի գործով՝ ինչ-որ մեկը իրեն զրպարտել է, որի գրասենյակում զենք է եղել, չգիտենք՝ նա ճիշտ է ասել, թե սուտ է ասել եւ այդ ասածի հիման վրա Արմեն Թավադյանին բռնել են, իսկ այդ տղան ազատության մեջ ման է գալիս, մի բան էլ՝ հարցազրույցներ տալիս»,-ասաց Իսագուլյանը։

Հիշեցնենք, նախօրեին հայտնի դարձավ, որ «Առագաստ» սրճարանում սպանված Պողոս Պողոսյանի մահվան փաստի առթիվ հարուցված քրեական գործով կայացված դատական ակտը նոր երևան եկած հանգամանքների հետևանքով վերանայելու համար Երևան քաղաքի դատախազությունում հարուցվել է համապատասխան վարույթ և քննություն կատարելու հանձնարարությամբ ուղարկվել ՀՀ ՔԿ ԵՔՔՎ ծանր հանցագործությունների քննության բաժին:

Ավելի վաղ ՀՀ վարչապետի աշխատակազմի տեղեկատվության և հասարակայնության հետ կապերի վարչությունն ու ՔԿՀ լրատվական ծառայությունը հաստատել էին տեղեկությունը, որ Հոկտեմբերի 27-ի ահաբեկչական խմբի ղեկավար Նաիրի Հունանյանը նամակ է հղել ՀՀ վարչապետ Նիկոլ Փաշինյանին՝ չհրապարակայնացնելով նամակի բովանդակությունը։ Իսկ պաշտոնապես հաստատումից առաջ մամուլը գրել էր, որ նամակում Հունանյանը ողջունել է 27-ի անջատված մասով նախաքննությունը վերսկսելու որոշումը եւ պատրաստակամություն է հայտնել մասնակցել գործի քննությանը՝ խոստանալով ջանք չխնայել եւ աջակցել կազմակերպիչների բացահայտմանը։ Նա նշել է, որ ինքն այդ գործով «ասելիք ունի»։

«Ամենամեծ ողբերգությունը կայանում է նրանում, որ մենք իրավունք ենք տալիս դրսեւորվելու մարդկանց, որոնք դրսեւորման իրավունք չունեն ընդհանրապես։ Մարդուն, որը սարսափելի ահաբեկչական ակտ է կատարել և, ըստ էության, գլխատել է երկիրը եւ հիմա մենք այդ մարդուն շանս ենք տալիս եւ ասում ենք՝ դու կարող ես երկրի պրոցեսների վրա ունենալ ազդեցություն եւ կարեւոր չէ՝ դու ինչ կհորինես, դա իրականությանը կհամապատասխանի, թե չէ։ Հնարավորություն է տրվում այդ կարգի տականքներին, որ նորից դրսեւորվեն եւ դրա հիման վրա գործողություններ արվեն՝ կապված տարբեր մարդկանց հետ»,-«Փաստինֆո»-ին հետ զրույցում շարունակեց Գառնիկ Իսագուլյանը։

Իսագուլյանը համոզված է, որ երկու դեպքում էլ՝ թե Պողոս Պողոսյանի մահվան, թե «Հոկտեմբերի 27»-ի գործերը, իշխանությունը փորձելու է ՀՀ 2-րդ նախագահի անվան հետ կապել, քանի որ օրվա իշխանությունների ցանկությունները համընկնում են դատախազի, քննչականի ու ՀՔԾ պետերի գործողություններին, իսկ վերջիններս էլ պատրաստ են ցանկացած քայլի, միայն թե իրենց էլ «չփռեն ասֆալտին», ցանկացած քայլի պատրաստ են։

«Պատկերացնո՞ւմ եք, Նաիրի Հունանյանը կարող է գործոն դառնալ Հայաստանի հետագա կյանքի մեջ»,-նշեց Իսագուլյանը՝ չբացառելով, որ այս ամենը կարող է կապ ունենալ Ռոբերտ Քոչարյանի դիմումների վերաբերյալ ՄԻԵԴ-ից սպասվող պատասխանների հետ։

Ինչ վերաբերում է Պողոս Պողոսյանի մահվան գործին, Իսագուլյանը նշեց. «Օրինական ուժի մեջ մտած դատավճիռ կա։ Հիմա, եթե վատ են դատել, քիչ են դատապարտել, իրենց գործն է, թող բացեն, նայեն, բայց իրենց խնդիրը դա չէ, իրենց խնդիրը այդ ամենը Ռոբերտ Քոչարյանի հետ կապելն է, նրա անունը տալը»։

Որպես օրինակ գառնիկ Իսագուլյանը ՍԴ նախագահ Հրայր Թովմասյանի սանիկի գործն է նշում.«Տեսեք մարդուն՝ Նորայր Փանոսյանին կալանավորում են, լրատվամիջոցները ոչ թե իրենց վերնագրերում նշում են ՝ քաղաքացի Նորայր Փանոսյանը, այլ անպայման շեշտում են՝ Հրայր Թովմասյանի սանիկ Նորայր Փանոսյանը անցնում է այսինչ քրեական գործով։ Այն մարդկանց, որոնց ուզում են անօրեն կերպով ազատազրկել, վարկաբեկել, դատել, ցանկացած երեւույթ կարող են կապել այդ մարդու հետ, օրինակ, կարող են հայտարարել, որ փողոցում, որտեղ Գառնիկ Իսագուլյանն ապրում է, մարդ է ընկել մեքենայի տակ, բայց ի՞նչ կապ ունի դա ինձ հետ»։

Իսագուլյանին զարմացնում է, թե ինչ աստիճանի է հասել մաղձի չափաբաժինը Հայաստանում։

«Հավատացեք, որ այն երեւույթները, որ տեղի են ունենում Հայկ Հարությունյանի, Գեորգի Կուտոյանի հետ ինչ-որ տեղ այս ամենի արդյունքն է, այս ամենը ազդում է մարդկանց վրա։ Մարդն իր տանը նստած կարող է մտածել, ինքը նախկինում ղեկավարել է այդ ծառայությունը ամեն րոպե կարող են հրահանգ տալ, Սասուն Խաչատրյանը որոշի, որ պետք է գան, իրեն տանեն կալանավորեն՝ խայտառակեն ընտանիքի , հարազատների ու մյուսների մոտ եւ քանի որ վայրահաչողների ահռելի ոհմակ էլ ունեն, քսի են տալիս ու վերջ, մարդը կարող է վարկաբեկվել»,-ասաց Գառնիկ Իսագուլյանը՝ շարունակելով.

«Սա է ընդամենը, եւ Նաիրի Հունանյանի, եւ Պողոս Պողոսյանի գործով իրենք են մարդկանց ասում՝ էս ամեն ինչը թարմացրեք, դրա համար եմ ասում, որ մինչեւ Հուլիոս Կեսար ու Մակեդոնացի կարող են գնալ ու վերջում կպարզվի, որ Մակեդոնացուն էլ Սերժ Սարգսյանի մտերիմներն են թունավորել»։

Աղբյուր` Փաստինֆո