Փաստ ինֆո

Սպանդանոցները նախատեսված են խոշոր ֆերմաների համար, իսկ սովորական գյուղացու դեպքում, ով քիչ անասուն ունի, սխալ է սպանդանոցների տարբերակը կիրառել։ Այս մասին «Փաստինֆո»-ի հետ զրույցում ասաց «Ֆերմերային շարժում» հ/կ նախագահ Սարգիս Սեդրակյանը։

Նա նշեց, որ քիչ անասուններ ունեցող գյուղացիների դեպքում պետք է կիրառել շրջիկ սպանդանոցների տարբերակը. «Պետք է այդ շրջիկ սպանդանոցները մեքենայով գան, կանգնեն գյուղում, տեղում մորթ իրականացնեն ու գնան»։
«Ֆերմերային շարժում» հ/կ նախագահը շեշտեց, որ սպանդանոցներում մորթ իրականացնելը դրական է այն առումով, որ սանիտարահիգիենիկ պայմանները պահպանված են։

«Կարծում եմ՝ սպանդանոցներում հիվանդ անասուն չեն կարող մորթել և եթե անգամ լինի, ապա դա կխոսի կոռուպցիոն ռիսկի մասին։ Սակայն ամենավատն այն է, որ գյուղացին պետք է բավականին շատ գումար ծախսի, չարչարվի, անասունը տանի-հասցնի սպանդանոց, այնտեղ էլ մորթելու համար` գումար մուծի»,-ասաց Սեդրակյանը։

Նրա կարծիքով, կառավարությունը պարտավոր է հաշվի նստել անասնապահների հետ և հաշվի առնի, որ այս կերպ դժվարություններ են ստեղծվում։
Դիտարկմանը, թե գյուղացիներն ասում են՝ սպանդանոցներում իրենցից նախատեսվածից շատ գումար են վերցնում, «Ֆերմերային շարժում» հ/կ նախագահն ասաց. «Այո, այդտեղ կոռուպցիոն ռիսկեր կան, նաև կախված նրանից, թե միսն ինչ կարգի կգնահատեն»։
Սեդրակյանն ընդգծեց՝ իշխանությունները պետք է հետևողական լինեն, հաշվի նստեն գյուղացիների հետ, լսեն նրանց առաջարկները, գան փոխհամաձայնության, այլապես գյուղացին կարտագաղթի։

Ամփոփելով խոսքը, «Ֆերմերային շարժում» հ/կ նախագահն ասաց, որ նախկին իշխանությունները սխալ ագրագային քաղաքականություն են վարել և նորերը հիմա ավելի վատ ձևով շարունակում են այն։

Հեղինակ՝ Սոնա Գեւորգյան

Աղբյուր` Փաստինֆո