Փաստ ինֆո

Հայաստանում խոսքի ազատությունը վտանգված է։ Այսօր նման հայտարարությամբ է հանդես եկել ՀՀԿ փոխնախագահ Արմեն Աշոտյանը, որն այս պահին իր կուսակից մի շարք ընկերների հետ գտնվում է վերաքննիչ քրեական դատարանի շենքի մոտ։

Ավելի վաղ «Փաստինֆո»-ն հաղորդել է, որ այսօր վերաքննիչ քրեական դատարանում քննարկվում է «5-րդ ալիք» հեռուստաընկերության սեփականատեր Արմեն Թավադյանին կալանավորելու որոշման դեմ փաստաբանի ներկայացրած վերաքննիչ բողոքը։

Դատարանի շենքի մոտ հավաքվել են մի խումբ աջակիցներ, որոնց թվում են նաեւ հանրապետական գործիչներ։ Ա.Աշոտյանը նշեց, որ եկել են աջակցելու Արմեն Թավադյանի դեմքով մամուլի ազատությանը։ «Վերջին զարգացումները վկայում են այն մասին, որ այս իշխանությունները իրոք նոր ուղի են սկսում ազատ խոսքի, այլակարծության նկատմամբ։ Նիկոլ Փաշինյանի հայտարարությունները՝ կապված հեռուստաընկերությունների կոռուպցիոն լոգոների հետ եւ ԱԺ-ում լսումների ժամանակ ծավալված քննարկումների մի մասի շեշտադրումները վկայում են, որ Հայաստանում ազատ խոսքը վտանգված է։ Չկա քաղաքականություն առանց ազատ խոսքի, չկա քաղաքական գործունեության առանց այլակարծության եւ այսօր Արմեն Թավադյանն իր վրա է կրում այս ռեժիմի ռեպրեսիվ ապարատի ամբողջ ծանրությունը»,- հայտարարեց Ա.Աշոտյանը։

Ըստ նրա՝ ակներեւ է, որ գործը հերթական սարքած, շինծու գործն է, որտեղ որեւէ համոզիչ փաստարկ չկա ։ «Թավադյանի եւ TV 5-ի հետեւից վաղուց էին ընկել, դա տեսանելի էր, բայց այս դրսեւորումները պարզապես զարհուրելի են։ Եկել ենք ասելու, որ չի ստացվելու, մի նայեք հարյուր ենք, թե հազար ենք, պետք է լինի կլինենք 5 հազար, օրհասական լինի՝ կլինենք 10 հազար, քանակը կապ չունի։ Այստեղ ենք բարձրաձայնելու մեր մտահոգությունները՝ այլակարծությունների հետ կապված։ Ոչ ոք չի կարող մեր բերանը փակել, ԶԼՄ-ների նկատմամբ անպատիժ ճնշումներ գործադրել չի կարող, մի տեղից դուրս է գալու, այս իշխանությունների քթից դուրս է գալու։ Ես վստահ եմ, որ այս գործերը դոմինոյի էֆեկտի նման քանդվելու են ցանկացած միջազգային ատյանում, տվյալ դեպքում ՄԻԵԴ-ում »,- ասաց Աշոտյանը։

Նա հայտարարեց, որ դատական համակարգից որեւէ սպասելիք չունեն։ «Հույս դնել իրավապահ համակարգի, դատական համակարգի պսեվդոանկախության վրա, ավաղ չի լինում։ Հայաստանում չկան պետական ինստիտուտներ, ցավում եմ։ Թող այս դատական ատյանում հաճելիորեն զարմացնեն եւ ես օրվա վերջ ներողություն կխնդրեմ, եթե հանկարծ որոշումը լինի արդար եւ ոչ թե այն, ինչ կանխատեսում ենք, այն է՝ մամուլի նկատմամբ ճնշումների բանեցման վճիռը կլինի»,- նշեց Աշոտյանը։

Աղբյուր` Փաստինֆո