Փաստ ինֆո

Վերաքննիչ քրեական դատարանում «5-րդ ալիքի» սեփականատեր Արմեն Թավադյանի խափանման միջոցը փոխելու բողոքը մերժվելու է. այդպիսի «շշուկներ» կան։ Դատարանի մոտ այսօր՝ հունվարի 20-ին, հայտարարել է «5-րդ ալիքի» գործադիր տնօրեն Հարություն Հարությունյանը։

Նշենք, որ Վերաքննիչ քրեական դատարանում քննվում է «5-րդ ալիք» Հ/Ը սեփականատեր Արմեն Թավադյանի խափանման միջոցը փոխելու հարցը։
Հ.Հարությունյանը հայտարարեց, որ Արմեն Թավադյանի կալանավորումը ազդել է «5-րդ ալիքի» գործունեության վրա.

«Չի կարող ազդած չլինել, ազդել է։ Մենք ունեինք նախագծեր, որոնք պետք է սկսեինք, բայց այդ նախագծերը դադարեցրել ենք, այն ծրագրերը, որոնք մենք ունեինք այդ ամբողջ հիմա կանգնեցրած վիճակում են»։

Նա շեշտեց, որ առանց սեփականատիրոջ ներկայության դժվար է շարունակելը. «Հայաստանում, չեմ կարծում, որ կա մի լրատվամիջոց, որ առանց սեփականատիրոջ ներդրումների կամ աջակցության կկարողանա զարգացնել իր ծրագրերը»։

Հարություն Հարությունյանն ասաց, որ որեւէ ակնկալիք չունի բողոքի այսօրվա քննությունից. «Շշուկներ եմ լսել, որ հանձնարարություն կա մերժելու։ Այս երկրում մի հոգի է հանձնարարություններ իջեցնում։ Եթե հակառակ որոշում կայացվեց, ես ներողություն կխնդրեմ»։

Դեկտեմբերի 19-ին ոստիկանությունը տեսանյութ էր տարածել, ըստ որի Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի։

Դեպքի առթիվ ոստիկանությունում քրեական գործ է հարուցվել, որով նախաքննությունը կատարվում է ՀՔԾ-ում։

«Փաստինֆո»-ն ավելի վաղ հայտնել էր, որ նախաքննական մարմինը ոստիկանության կողմից ներկայացված արարքը որակել է սուտ ցուցմունք տալու համար տուժողին կաշառելը, որ կատարվել է կազմակերպված խմբի կողմից եւ մեղադրանք առաջադրել ՀՀ երկրորդ նախագահ Ռոբերտ Քոչարյանի ենթադրյալ աջակից՝ ավելի վաղ ձերբակալված Վ.Մկրտչյանին՝ ՀՀ քրեական օրենսգրքի 340-րդ հոդվածի 4-րդ մասի 1-ին կետով, եւ նրան ազատել արգելանքից։ Փոխարենը նույն օրը ձերբակալվել է հեռուստաընկերության սեփականատեր Արմեն Թավադյանը, ապա նաեւ կալանավորվել՝ նույն մեղադրանքով։

Աղբյուր` Փաստինֆո