Փաստ ինֆո

Ազգային ժողովում քննարկվում է «ԱԺ կանոնակարգ ՀՀ սահմանադրական օրենքում լրացում կատարելու մասին» օրինագիծը, որով նախատեսվում է խմբակցություններին և ԱԺ փոխնախագահներին խորհրդարանական լսումներ իրականացնելու հնարավորություն ընձեռել։

Նախագծի հեղինակ ԱԺ փոխնախագահ Վահե Էնֆիաջյանը նկատեց՝ կանոնակարգ օրենքն ամբողջությամբ չի արտացոլում ներկայիս իրողություններն ու արդյունավետությունը, հետևապես անհրաժեշտ են իրավակարգավորումներ։

«Այս փոփոխությամբ փոխխոսնակներին և խմբակցությունների համար լսումներ իրականացնելու հնարավորություն ենք ընձեռում, ինչը չափազանց կարևոր է։ Հաճախ այս ամբիոնից կամ տարբեր հարթակներում խոսում ենք, որ մեր սահմանադրությունը հնարավորություն է տալիս, որ լիարժեք խորհրդարանական գործառույթներ իրականացնենք, բայց խորհրդարանական գործառույթներն առաջին հերթին պարունակ է գործիքակազմ, որից մեկը նաև լսումներ իրականացնելու գործիքն է։ Այս գործիքակազմից մենք լավագույնս չենք օգտվում»,-ասաց ԱԺ փոխխոսնակը։

Վահե Էնֆիաջյանն այս սահմանափակումը որակեց արհեստածին և նշեց՝ իրավակարգավորումը միտված է վերացնել այդ սահմանափակումը և հնարավորություն ընձեռել բոլոր խմբակցություններին ևս մեկ լսումներ իրականացնելու հնարավորություն ունենան։

ԱԺ փոխնախագահն անդրադարձավ ևս մեկ կարևոր հանգամանքի։ Նա ընդգծեց, որ ԱԺ փոխխոսնակներին այս լիազորություններն ընձեռելով՝ որևիցե մեկից այս լիազորությունները չեն վերցնում. «Սա լրացուցիչ հնարավորություն է ավելի շատ, ավելի արդյունավետ աշխատելու։ Աշխատասենյակներով հաճախ որոշումներ կայացնելով՝ այնպիսի որոշումներ են քննարկվում ու կայացվում, որ դժգոհության ալիքներ են բարձրանում։ Պարբերաբար ԱԺ-ի դիմաց բողոքի ակցիաներ են կազմակերպում։ Ի՞նչն է խնդիրը, որ սահմանափակում ենք մտցնում և հնարավորություն չենք ընձեռում, որ ոլորտի շահառուներ, մասնագետները, պետական գերատեսչությունների պատասխանատուները գան խորհրդարան և համակողմանի լսումներ իրականացնենք»,-նշեց Վահե Էնֆիաջյանը՝ հավելելով, որ սա ֆինանսական որևէ պարտավորություն չի առաջացնում։

Աղբյուր` Փաստինֆո