Փաստ ինֆո

Ինքնին կարող է այս ինստիտուտը գոյություն ունենալ, եթե այն չվերաբերի ԱԺ նախագահի տեղակալներին։ Խորհրդարանում ԱԺ խմբակցություններին և փոխխոսնակներին խորհրդարանական լսումներ հրավիրելու լիազորությամբ օժտելու նախագծի ժամանակ այս մասին հայտարարեց ԱԺ պետաիրավական հանձնաժողովի նախագահ Վլադիմիր Վարդանյանը։

«Օրենսդիր մարմնի ղեկավարի տեղակալը չունի ինքնուրույն լիազորություններ։ Այն իրականացնում է ԱԺ նախագահի հանձնարարությամբ համապատասխան լիազորություններ։ Ընդ որում ԱԺ-ի նախագահի հանձնարարությամբ այդ լիազորությունները կարող է իրականացնել ամբողջ ծավալով կամ մասնակիորեն։ Տվյալ պարագայում, եթե տեղակալներն օժտվում են լսումներ հրավիրելու իրավասությամբ, ստացվում է իրավիճակ, որ տեղակալը ստանում է ինչ-որ առումով շատ հնարավորություններ, քան նախագահը։ Եթե մենք գնանք այս ճանապարհով, կստացվի՝ օրինակ այսօր ԱԺ յուրաքանչյուր տեղակալ կարող է ինձ ընդհատել։ Տեղակալներն ինքնուրույն լիազորություն չունեն»,-նշեց Վլադիմիր Վարդանյանը։

Նա չբացառեց խորհրդարանական լսումներ կազմակերպելու իրավունք ունեցող սուբյեկտների շրջանակի ընդլայնումը։ Միևնույն ժամանակ նկատեց՝ ԱԺ-ում կա 15 սուբյեկտ, որը նստաշրջանի շրջանակներում կարող է հրավիրել լսումներ։ Յուրաքանչյուր նստաշրջանում կարող է հրավիրվել ամենաքիչը 15 լսում, այսինքն մեկ տարվա ընթացքում՝ 30 լսում, սակայն նախորդ տարվա ընթացքում հրավիրվել է ընդամենը 9 լսում. «Այս կարգի կանոնակարգումներ նախատեսելն իմ կարծիքով որևիցե եղանակով չի բարձրացնում խորհրդարանական վերահսկողությունը։ Էլ չեմ ասում, որ նման իրավակարգավորում նախատեսելով՝ ընդդիմադիր խմբակցություններին կդնենք ծայրահեղ ոչ հավասար իրավիճակի մեջ, որովհետև այն ընդդիմադիր խմբակցությունը, որի կազմից ընտրվել է փոխխոսնակ, հնարավորություն է ունենալու անցկացնել անսահմանափակ լսումներ այն պարագայում, երբ խմբակցությունը, որն ընտրված փոխնախագահ չունի, սահմանափակ քանակությամբ հնարավորություն է ունենալու»,-հավելեց Վլադիմիր Վարդանյանը։

Հեղինակ՝ Հասմիկ Կոշկարյան

Աղբյուր` Փաստինֆո